Sveitarfélögin Reykjanesbær, Sandgerði, Vogar og Garður og Fluglestin-þróunarfélag hafa undirritað samstarfssamning um skipulagsmál vegna hraðlestar milli Keflavíkurflugvallar og höfuðborgarsvæðsins.
Þetta kemur fram í fréttatilkynningu frá Fluglestinni-þróunarfélagi.
Samningurinn gildir til fimm ára en á þeim tíma skuldbinda sveitarfélögin sig til að taka ekki taka þátt í sambærilegu verkefni við aðra en Fluglestina-þróunarfélag. Hætti félagið við verkefnið falli samningurinn úr gildi en þær greiningar og gögn sem orðið hafa til teljist opinberar og almenningseign.
Í tilkynningunni segir að markmiðið með samningnum sé að tryggja hagkvæmni framkvæmdarinnar og styrkja byggð og atvinnulíf á Suðurnesjum.
„Samið hefur verið um greiningu á samfélagslegum áhrifum framkvæmdarinnar á nærumhverfi með sérstöku tilliti til fasteignaverðs, launaþróunar og atvinnulífs, meðal annars ferðaþjónustu.
Verkefninu stýrir hópur skipaður fulltrúum frá sveitarfélögunum og þróunarfélaginu.
Breyta þarf skipulagi svo koma megi fyrir lestarlínu, lestarstöðvum og viðhaldsaðstöðu. Með samstarfssamningnum veita sveitarfélögin vilyrði fyrir lóðum í deiliskipulagi og úthluta þeim og/eða byggingarrétti, skv. nánara samkomulagi. Þá munu sveitarfélögin einnig tryggja nauðsynlegt samstarf við framkvæmd og gerð mats á umhverfisáhrifum,“ segir í tilkynningunni.
Skrifa undir samstarfssamning um skipulagsmál vegna hraðlestar

Tengdar fréttir

Samstarf um skipulag vegna hraðlestar
Samtök sveitarfélaga á höfuðborgarsvæðinu auk Reykjavíkur, Kópavogs, Hafnarfjarðar og Garðabæjar fyrir sitt leyti stefna að því að gera samstarfssamning við Fluglestina Þróunarfélag ehf. um undirbúning að byggingu hraðlestar til Keflavíkurflugvallar.

Reykjavík eignast hlut í félagi um mögulega hraðlest
Formaður borgarráðs segir tímaspursmál hvenær hugmyndirnar verði að veruleika.

Hraðlestin til Keflavíkurflugvallar sögð skila 13 milljörðum á fyrsta ári
Félagið sem nú leitar fjárfesta að hraðlest til Keflavíkurflugvallar áætlar að lestin rúlli af stað árið 2024 og skili 13,5 milljarða króna tekjum á fyrsta ári. Fargjöld verða 1.000 til 4.300 krónur með 3.100 króna meðalfargjald