Ásættanleg byrjun í Úkraínu

Strákarnir okkar tóku sitt fyrsta skref í nýrri keppni eftir EM-ævintýri sumarsins er Ísland gerði 1-1 jafntefli gegn Úkraínu ytra í undankeppni HM 2018 í Rússlandi.

Tilfinningarnar eftir leikinn voru blendnar. Okkar menn spiluðu frábærlega fyrstu 40 mínútur leiksins og hefðu með réttu átt að vera með meira en 1-0 forystu þegar jöfnunarmark Úkraínu kom í lok hálfleiksins. Úkraína spilaði svo betur í síðari hálfleik og okkar menn gátu prísað sig sæla að komast frá leiknum með skiptan hlut, enda brenndu heimamenn af vítaspyrnu þegar skammt var til leiksloka.

Vantaði bara fleiri mörk

Alfreð Finnbogason gaf tóninn þegar hann skoraði úr þröngu færi snemma í leiknum en þrátt fyrir mikið kæruleysi í varnarleik heimamanna náðu strákarnir ekki að nýta sér það frekar. Jón Daði Böðvarsson fékk besta færið til að skora annað mark Íslands er hann fékk tvö skotfæri eftir frábæran undirbúning Alfreðs en fyrra skot hans fór í varnarmann og það síðara yfir, fyrir nánast opnu marki.

Heimamenn voru líkt og flestir andstæðingar Íslands á EM í sumar mun meira með boltann en náðu ekki að gera sér mikinn mat úr því. Framan af leik átti Ísland mun fleiri marktilraunir, til samanburðar, og spilaði vel. Það vantaði bara fleiri mörk.

Vendipunktur leiksins kom á 39. mínútu, er Ari Frey Skúlason sneri sig illa á ökkla. Hann var keyrður í burtu á börum og örfáum sekúndum eftir að leikurinn hófst á ný, og varamaður Ara Freys ekki kominn inn á, skoraði Andriy Yarmolenko jöfnunarmark Úkraínu eftir að hafa hirt frákastið af markvörslu Hannesar Þórs Halldórssonar beint út í teig.

Kærkomið klúður

Það var ágæt barátta í okkar mönnum framan af síðari hálfleik og fór þar fyrirliðinn Aron Einar fremstur í flokki. En Gylfi Þór Sigurðsson, sem haltraði um skamma stund í fyrri hálfleik eftir að hafa fengið högg á fótinn, virtist ekki samur og áður og sömuleiðis dró af sóknarmönnum Íslands.

Úkraínumenn gerðust sókn­djarfari eftir því sem leið á leikinn og uppskáru vítaspyrnu á 83. mínútu er varamaðurinn Arnór Ingvi Traustason braut klaufalega á Bohdan Butko, bakverði Úkraínu. Yevhen Konoplyanka fór sem betur fer illa að ráði sínu og skaut í utanverða stöngina og fram hjá. Keimlíkt vítaspyrnunni sem Austurríkismenn klúðruðu í leiknum gegn Íslandi á EM í Frakklandi.

Erfitt að spila eftir EM

„Ég á erfitt með að meta þennan leik. Við vorum mjög ánægðir með fyrri hálfleikinn og hann spilaðist eins og við vildum. Við vorum þolinmóðir og fengum góðar opnanir,“ sagði Heimir Hallgrímsson landsliðsþjálfari við íþróttadeild í gær.

„Seinni hálfleikurinn var svo ekki okkar besti. Við gáfum ekki mörg færi á okkur en við vitum að við getum spilað mun betur en þetta. Við vissum alltaf að það yrði erfitt að byrja að spila aftur eftir EM.“

Öll liðin í riðli Íslands gerðu 1-1 jafntefli í gær og Heimir er ánægður með stöðu Íslands.

„Nú eru öll liðin jöfn en við búnir með erfiðan leik í Úkraínu. Hingað munu ekki mörg lið koma og fá meira en eitt stig. Við vorum ekki alveg nógu sáttir við spilamennsku okkar en getum verið nokkuð ánægðir með niðurstöðuna.“