Birtir lista yfir meinta nýrasista

Vefsíðan Sandkassinn, sem nýverið komst í fréttir vegna herferðar gegn Útvarpi Sögu, hefur nú tekið upp á því að birta lista yfir meinta „Íslenska nýrasista“ eins og það er orðað.

Einn þeirra sem á listann hefur ratað, Gústaf Níelsson sagnfræðingur, hefur upplýst að hann ætlar að kæra ritstjórann og síðuna vegna hatursummæla í sinn garð. Jón Magnússon lögmaður, sem einnig er á þessum lista, segist sjaldan hafa séð annan eins sóðaskap í íslenskum fjölmiðlum.

„Svona vinnubrögðum pólitískra andstæðinga minna mun ég ekki una, heldur kæra háttarlagið til lögreglu, sem kemst ekki undan því að rannsaka tilurð lista af þessu tagi, tilgang hans og leggja mat á hættuna sem fólki kann að vera stofnað í,“ skrifar Gústaf á Facebooksíðu sína.

Ritstjóri Sandkassans, Gunnar Waage, segir í orðsendingu á vefnum að þar séu listað það fólk sem „hér eru listaðir þeir menn og konur sem eru áberandi í umræðum á opinberum vettvangi, gegna ábyrgðarstöðum, háir jafnt sem lágir, sem eiga það sameiginlegt að beita sér af mikilli hörku í garð fjölmenningar á Íslandi. Margir þeirra afneita tilvist fjölmenningar hér á landi alfarið.“

Fjöldi þekktra Íslendinga á hinum vafasama lista

Gunnar fullyrðir að ekki sé nokkur leið að komast á þennan lista fyrir slysni. „Það er ekki nóg að missa einu sinni út úr sér eitthvað og vinna sér inn greininguna nýrasisti. Til þess þarf einbeittan áróður gegn fólki á grundvelli þjóðernis, litarháttar eða uppruna yfir talsvert tímabil. Þeir sem hér eru, eru persónur sem rekið hafa slíkan áróður yfir langt tímabil.“

Listi Gunnars yfir hina meintu nýrasista er að taka á sig mynd og þar er í fyrsta sæti Páll Vilhjálmsson. Næstur á blaði er Gústaf Níelsson og neðar á lista eru ýmsir þjóðþekktir einstaklingar svo sem Jón Magnússon, Jón Valur Jensson, Davíð Oddsson, Margrét Friðriksdóttir, Vigdís Hauksdóttir, Sveinbjörg Birna Sveinbjörnsdóttir og þau Pétur Gunnlaugsson og Arnþrúður Karlsdóttir. Svo einhverjir séu nefndir af þessum 20 manna lista.

Vill að nýstofnað embætti um hatursorðræðu láti málið til sín taka

Gústaf segir að sig hafi rekið í rogastans þegar hann las á Sandkassanum að hann nyti þessa vafasama heiðurs. Hann telur að þessi listi og slík skrif geti stofnað lífi þeirra sem þar eru í hættu, „enda ganga öfgamúslimar nú ljósum logum um alla Evrópu og drepa fólk ýmist af handahófi eða eftir einhverjum listum.“

Gústaf segist ekki gera ráð fyrir öðru en nýstofnað lögregluembætti um hatursorðræðu muni taka upp rannsókn á málinu að eigin frumkvæði. Vísir hefur reynt að ná í Eyrúnu Eyþórsdóttur, sem stjórnar hinni nýstofnuðu deild um hatursglæpi og hatursorðræðu, en Eyrún er í fríi þessa dagana og er væntanleg til starfa í næsta mánuði.

Jón Magnússon lögmaður ætlar heldur ekki að taka þessu þegjandi, ef marka má ummæli á Facebooksíðu hans, þar sem hann segist sjaldan hafa séð annan eins „sóðaskap í íslenskri fjölmiðlun og þetta og svo lengi sem ofangreindir einstaklingar eru listaðir á þessari síðu og taka ekki afstöðu gegn þessum ófögnuði þá ljá þau þegjandi samkomulagi við sóðaskapinn.“