Sátt næst í Síldarævintýrisdeilunni: Fjallabyggð mun ekki greiða kostnaðinn nema æðra stjórnvald krefjist þess

Fjallabyggð mun ekki greiða löggæslukostnað nema æðra stjórnvald eða dómstólar ákveði að Fjallabyggð beri að greiða þann kostnað. Þetta er lausn sem bæjaryfirvöld í Fjallabyggð og lögreglustjóraembættið á Norðurlandi eystra hafa komið sér saman um greiðslu á löggæslukostnaði vegna bæjarhátíðarinnar Síldarævintýrið á Siglufirði 2016.

Embætti lögreglustjórans á Norðurlandi eystra hafði lagt 180 þúsund króna löggæslukostnað fyrir tækifærisleyfi til hátíðarhalda á Síldarævintýrinu. Bæjarráð Fjallabyggðar mótmælti þessum kostnaði og kvartaði til innanríkisráðuneytisins. Sú kvörtun var send til atvinnu- og nýsköpunarráðuneytisins til þóknanlegrar meðferðar.

Í sáttinni sem fékkst á milli bæjaryfirvalda og lögreglunnar kemur fram að Fjallabyggð muni ekki greiða þennan kostnað nema æðra stjórnvald eða dómstólar ákveði að Fjallabyggð beri að greiða þann kostnað.

Lögreglustjóraembættið mun í framhaldi af þessari ákvörðun bæjarráðs gefa út jákvæða umsögn til Sýslumannsembættisins varðandi tækifærisleyfi fyrir hátíðina.