Steypan stenst

Þorbjörn Þórðarson fréttamaður skrifaði grein í Fréttablaðið þann 19. maí undir heitinu „Steypa leiðrétt“.

Greinin er skrifuð til höfuðs grein undirritaðra frá 20. apríl síðastliðnum sem heitir „Hin stóra flétta hrægammastjórnarinnar“. Þorbjörn heldur því fram, að fullyrðingar greinarhöfunda um að Íslendingar hafi keypt kröfur í slitabú föllnu bankanna á eftirmarkaði og notað til þess fé úr skattaskjólum séu rangar. Þorbjörn segir að kröfuskrár fyrir alla bankana liggi fyrir og að samkvæmt ítarlegri greiningu Seðlabankans séu útlendingar raunverulegir eigendur um 95% allra krafna í slitabúin. Þetta segir Þorbjörn vera staðreynd en allt annað sé steypa.

Staðreyndin er sú að Seðlabankinn telur að 95% af kröfuhöfum bankanna séu erlendir aðilar og 5% innlendir. Bankinn hefur upplýst að mögulegt sé að innlendir aðilar séu í einhverjum mæli á bak við erlendu aðilana en það sé þó ekki þekkt. En hvaða huldumenn standa svo að baki þessum erlendu aðilum?

Samkvæmt reglum Alþjóðagjaldeyrissjóðsins, sem bankinn fylgir, ræður skráð heimilisfang þjóðerni hvers félags. Því má spyrja: Telst Wintris erlent eða íslenskt félag skv. skilgreiningu Seðlabankans? Sé svarið erlent er augljóst að stór hluti kröfuhafa er íslenskur. Ef ekki hins vegar er komin upp grafalvarleg staða því þá hefur Seðlabankinn legið á sömu upplýsingum og Panamaskjölin hafa nú afhjúpað. Skorum hér með á Seðlabankann að upplýsa hvernig þessu er háttað.

Nöfn um 600 Íslendinga koma fyrir í Panama-skjölunum einum og ljóst að hundruð ef ekki þúsundir félaga í skattaskjólum eru í eigu Íslendinga. Samkvæmt mati Þorbjarnar hafa þeir allir tilkynnt Seðlabankanum í heiðarleika sínum hverjir þeir eru. Trúi því hver sem vill.

Í grein sinni klykkir Þorbjörn út með því að segja að það sé ábyrgðarhluti að kynna rugl sem staðreyndir. Enn fremur gerir hann þá kröfu til menntaðs fólks að það kynni sér málin áður en það ryðst fram á ritvöllinn.

Varðandi ábyrgðina hefði nú verið gott ef forsetinn og Hrunráðherrarnir allir hefðu lagt saman tvo og tvo og varað þjóðina við ÁÐUR en steypan harðnaði en ekki loka augunum fyrir hinu augljósa uns allt varð um seinan. Varðandi kröfu Þorbjarnar um menntun og kynningu erum við henni sammála og teljum jafnvel að hún ætti að gilda fyrir ómenntaða líka, hverjir svo sem það eru.

Greinin birtist fyrst í Fréttablaðinu 30. maí 2016.