Seinkanir hjá WOW air í dag

Áætlunarflug flugfélagsins WOW air fór úr skorðum í morgun eftir að snúa þurfti við vél vegna veiks farþega. Um var að ræða vél sem var að koma frá Boston og lenda þurfti í Kanada.

„Það var svo mikið af tengifarþegum í þessari fél þannig að þetta riðlar allri áætlun. En við erum að ná að vinna þetta upp. Við eigum von á að komast aftur á áætlun seinni partinn í dag,“ segir Svanhvít Friðriksdóttir, upplýsingafulltrúi WOW.

Svanhvít gerir ráð fyrir að um tveggja til þriggja tíma seinkun verði á flugferðum félagsins í dag. Öllum farþegum hafi þegar verið gert viðvart.

Aðspurð segist hún ekki geta tjáð sig um líðan farþegans sem veiktist um borð.