Vilja setja tímabundið bann við bankasölu

Þingmenn Samfylkingarinnar hafa lagt fram frumvarp á Alþingi um að sett verði á tímabundið bann við sölu á hlut ríkisins í fjármálafyrirtækjum. Verði frumvarpið að lögum öðlast þau gildi samstundis. Eiga þau að gilda til 1. nóvember á þessu ári.

Samkvæmt fjárlögum ársins hefur fjármálaráðherra heimild til þess að selja eignarhluti ríkisins í Arion banka, Íslandsbanka og það sem er umfram 70 prósent hlut ríkisins af heildarhlutafé í Landsbankanum. Vilja þingmenn Samfylkingarinnar að beðið sé með að selja hluti ríkisins í fjármálafyrirtækjum þangað til að ný ríkisstjórn hefur tekið við eftir boðaðar kosningar í haust.

Í greinargerð frumvarpsins segir að ríkja þurfi fullkomið traust til stjórnvalda hafi þau í hyggju að selja að hluta eða að öllu leyti eignarhluti ríkisins í fjármálafyrirtækjum. Segir einnig að þar sem núverandi ríkisstjórn muni aðeins sitja nokkra mánuði til viðbótar sé ekki eðlilegt að fjármálaráðherra hafi þá heimild að selja eignarhluti ríkisins í fjármálafyrirtækjum.

Verði frumvarpið að lögum taka þau gildi strax en falli niður þann 1. nóvember næstkomandi en þá gera má ráð fyrir að ný ríksstjórn verði tekin við.