Fjórmenningarnir í Norrænusmyglinu neita allir sök

Fjórmenningarnir sem ákærðir eru fyrir stórfelldan fíkniefnainnflutning hingað til lands með Norrænu á síðasta ári neituðu allir sök við þingfestingu málsins í Héraðsdómi Reykjaness í dag. Verði þeir fundnir sekir gætu þeir átt yfir höfði sér allt að tólf ára fangelsi.

Um er að ræða tvo Íslendinga og tvo Hollendinga sem sakaðir eru um að hafa reynt að smygla um 23 kílóum af fíkniefnum hingað til lands í september í fyrra.

Málið hefur vakið nokkra athygli því einn ákærðu, Hollendingurinn Angelo Uyleman, er greindarskertur. Hann sat í einangrun á Litla-Hrauni í átta vikur en sú vist var harðlega gagnrýnd vegna andlegrar fötlunar hans. Hann er ákærður fyrir að hafa staðið að innflutningnum, og samlandi hans fyrir að hafa undirbúið og aðstoðað Angelo við innflutninginn. Íslendingarnir tveir, sem eru á þrítugs- og fertugsaldri, eru ákærðir fyrir að hafa skipulagt og fjármagnað að hluta innflutninginn.

Við þingfestinguna í dag fór verjandi Angelo fram á það að dómkvaddur matsmaður yrði fenginn til að meta sakhæfi skjólstæðings síns.

Fíkniefnin falin í sérútbúnum geymsluhólfum

Atburðarásinni er lýst nokkuð ítarlega í ákærunni. Angelo er sagður hafa flutt fíkniefnin til Íslands frá Hollandi, en þau voru falin í sérútbúnum geymsluhólfum undir framsætum og í miðjustokk bifreiðar sem hann ók til Danmerkur og þaðan með farþegaferjunni Norrænu.

Í ákærunni segir að samlandi Angelo hafi séð um að bóka gistingu að bænum Stóra Knarrarnesi, og að þeir tveir hafi mælt sér mót þar í þeim tilgangi að fjarlægja fíkniefnin úr bifreiðinni. Hann hafi svo ætlað að koma fíkniefnunum áleiðis til annars Íslendingsins svo hægt yrði að koma þeim í söludreifingu.

Notuðust við dulkóðuð-textaskilaboð

Þá er Íslendingunum tveimur gefið að sök að hafa lagt á ráðin um innflutning fíkiefnanna. Kaupin hafi verið fjármögnuð með greiðslum í reiðufé inn á 30 Ikort upp á samtals níu milljónir króna. Þau hafi verið notuð til úttekta í hraðbönkum víða í Evrópu. Annar Íslendingurinn var handtekinn sama dag og Hollendingarnir, en þá var hann staddur skammt frá Stóra-Knarrarnesi. Fyrirhugað var að hann tæki við fíkniefnunum við Bláa lónið í Grindavík, að því er segir í ákærunni.

Í gæsluvarðhaldsúrskurði yfir Íslendingunum frá því í nóvember segir að við húsleit hjá öðrum þeirra hafi fundist kassar utan af Blackberry-farsímum.  Einn sími hafi verið notaður í samskiptum við erlenda samverkamenn og að við rannsókn lögreglu á símanum hafi komið í ljós að eingöngu var hægt að nota símann í þeim tilgangi að eiga dulkóðuð texta-samskipti.

Atburðarásinni, eins og henni er lýst í ákæru, má sjá hér fyrir neðan.

•    Þriðjudagurinn 22. september: Angelo kemur til Íslands frá Danmörku með Norrænu. Hann keyrir frá Seyðisfirði til Hafnar í Hornafirði.

•    Miðvikudagurinn 23. september: Angelo ekur bifreiðinni frá Höfn í Hornafirði til höfuðborgarsvæðisins

•    Fimmtudagurinn 24. september: Angelo keyrir til Keflavíkur og að morgni næsta dags leggur hann bílnum í skammtímastæði við Keflavíkurflugvöll og heldur af landi brott.

•    Mánudagurinn 28. september: Angelo kemur aftur til Íslands með flugi frá Amsterdam. Hann keyrir bílnum að bænum Stóra Knarrarnesi þar sem fyrirhugað var að fjarlægja fíkniefnin úr bifreiðinni. Þar eru Angelo og samlandi hans handteknir. Fíkniefnin fundust síðar við leit.

•    Mánudagurinn 28. september: Annar Íslendingurinn er handtekinn skammt frá Stóra Knarrarnesi. Fyrirhugað var að hann tæki við fíkniefnunum.