John Kerry: Bandaríkin hefðu verið í fullum rétti að skjóta niður rússnesku herþoturnar

Bandaríski herinn hefði verið í fullum rétti til þess að skjóta niður rússnesku herþoturnar sem flugu ítrekað yfir bandarískt herskip á Eystrasalti í vikunni. Þetta segir John Kerry, utanríkisráðherra Bandaríkjanna.

„Við fordæmum slíka hegðun. Hún er gáleysisleg, ögrandi og hættuleg,“ sagði Kerry í viðtali við fjölmiðla í Bandaríkjunum í dag. „Undir gildandi reglum um bardaga hefðum við verið í fullum rétti til þess að skjóta þær niður.“

Tvær rússneskar herþotur flugu ítrekað ískyggilega nálægt bandaríska herskipinu USS Donald Cook í vikunni. Skipið var statt á alþjóðlegu hafsvæði í Eystrasaltinu þegar herþoturnar, rússneskar Sukhoi SU-24, flugu allt að 12 sinnum yfir skipið. Atvikin áttu sér stað á mánudag og þriðjudag en engin vopn voru sjáanleg á þotunum. Skipstjóri herskipsins segir að líklega hafi herþoturnar verið að herma eftir árás á skipið.

John Kerry segir að skilaboðum hafi verið komið áleiðis til Rússland um að slík hegðun væri ekki boðleg og að bandaríski herinn myndi ekki láta ógna sér á hafi úti.

Rússneska varnarmálaráðuneytið segir að herþoturnar hafi fylgt öllum öryggisviðmiðum er þær flugu yfir bandaríska herskipið.

Myndband af atvikinu má sjá hér fyrir neðan.