Reykjavíkurborg sökuð um stórabróðurathæfi

Halldór Auðar Svansson borgarfulltrúi Pírata hefur sent bréf til embættis borgarlögmanns þar sem hann vill fá svar við lagalegri stöðu borgarstarfsmanna sem hafa fengið tiltal vegna meintra hatursummæla.

Málið er allt hið óljósasta og fást engin skýr svör frá borginni, en fyrir nokkru birtust óljósar fréttir þess efnis að einhverjir starfsmenn Reykjavíkurborgar hafi fengið tiltal vegna hatursummæla sem þeir eiga að hafa látið falla.

Vísir hefur fjallað ítarlega um málið og greindi í vikunni frá svörum Önnu Kristinsdóttur mannréttindastjóra Reykjavíkurborgar við fyrirspurn borgarfulltrúa Sjálfstæðisflokksins, þeirra Hildar Sverrisdóttur og Magnúsar Sigurbjörnssonar í mannréttindaráði.

Hildur Sverrisdóttir hefur tjáð sig um þau svör og sagt vinnubrögð borgarinnar til skammar. Í raun liggur ekkert fyrir um hver sagði hvað við hvern, auk þess sem lagaleg staða starsmanna er algerlega á huldu.

Málið minnir óþægilega mikið á mál Snorra í Betel

Í bréfi Halldórs Auðar, sem hann birti á Facebook nú í morgun, spyr hann um lagagrundvöll úrræða og vísar til nýlegs dóms í máli Snorra Óskarssonar gegn Akureyrarbæ, en á öllum dómsstigu var uppsögn hans sem kennari í bænum dæmd ólögmæt. Snorri er nú í skaðabótamáli gegn bænum.

Halldór Auðar segir dóminn í máli Snorra skýran að því leyti til að lagaheimild skorti til áminningar og brottreksturs á grundvelli háttsemi utan starfs eingöngu. „Þetta er mjög mikilvægt atriði og í þessu ljósi ber að skoða ofangreint svar þar sem fullyrt er að háttsemi utan starfs (hatursorðræða) geti leitt til áminningar og brottreksturs. Sú spurning vaknar hvort slíku hafi verið beitt innan borgarinnar sem og hvort yfir höfuð sé lagagrundvöllur fyrir slíkum íþyngjandi úrræðum í garð starfsfólks borgarinnar vegna tjáningar utan vinnu. Tjáningarfrelsið er stjórnarskrárvarinn réttur sem stjórnvald getur ekki skert eða beitt einstaklinga stjórnsýsluviðurlögum vegna nema hafa til þess skýra heimild.“

Hildur fagnar stuðningi úr ranni meirihlutans

Halldór segist hafa mikinn áhuga á að skoða hvað hafi verið gert nú þegar í þessum efnum og hvort lagagrunnurinn er traustur.

Hér fyrir neðan má heyra viðtal við Hildi Sverrisdóttur í útvarpsþættinum Harmageddon.

Merkilegt er í þessu er meðal annars það að Píratar eru í meirihlutasamstarfi í borginni. Málið hefur verið til umfjöllunar á umræðuvettvangi Pírata á Facebook. Formaður mannréttindaráðs er hins vegar Sóley Tómasdóttir Vinstri grænum. Þannig að víst er að pólitískt er málið þegar orðið hið óþægilegasta fyrir meirihlutann.

Einar Steingrímsson stærðfræðingur hefur meðal annarra vakið máls á þessum dularfullu hatursummælum og telur af og frá að Píratar geti staðið að gjerningi sem þessum:

„Það er ekki í lagi að borgaryfirvöld fylgist með skoðunum starfsmanna borgarinnar og tjáningu þeirra og veiti þeim tiltal, þegar ekki er um að ræða framgöngu viðkomandi í starfi sínu. Það er satt að segja hrikalegt að þetta fólk átti sig ekki á því hvers konar Stórabróðurathæfi þetta er. Þetta er mál sem Píratar í borgarstjórn ættu að vera í fararbroddi við að gagnrýna, tel ég,“ skrifar Einar.

Halldór hefur nú brugðist við hvatningu Einars sem og reyndar ýmissa Pírata annarra sem sem telja málið hið versta.

Hildur Sverrisdóttir fagnar bréfi Halldórs og sendir honum kveðju á Facebook: „Gleðilegt að sjá að einhver úr meirihlutanum tekur alvarlega athugasemdum okkar um að samkvæmt svörum frá borginni virðist hún ekki hafa heimild til að gera athugasemdir við opinber ummæli starfsmanna. Kúdós og takk Halldór Auðar Svansson, það er gott að fá stuðning til að fylgja þessu máli eftir.“

Ég var að senda póst til embættis borgarlögmanns, svohljóðandi.---Daginn,Nú veit ég ekki alveg hvort embætti...

Posted by Halldór Auðar Svansson on 9. mars 2016