„Ég hugsa að það muni rétt skríða í gegn“

„Ég hugsa að það muni rétt skríða í gegn. Ég hef trú á því,“ segir Vilhjálmur Árnason um áfengisfrumvarpið sem afgreitt var úr nefnd til annarrar umræðu í gær.

Meirihluti allsherjar- og menntamálanefndar Alþingis afgreiddi áfengisfrumvarpið til annarrar umræðu með tveimur breytingum.

Áfengisfrumvarpið afnemur einkaleyfi ÁTVR á sölu áfengis og opnar á sölu áfengis í smásöluverslunum.

Meirihluti allsherjar- og menntamálanefndar gerði þær breytingar á frumvarpinu að sett var inn ákvæði um að sveitarstjórn verði heimilt að setja það skilyrði að áfengi skuli aðgreint frá öðrum vörum í verslun og ráðherra setji nánari kröfur um aðgreininguna í reglugerð.

Þá gerði nefndin breytingu á hluta þess áfengisgjalds sem fer í forvarnir. Í gildandi lögum rennur 1 prósent þess í Lýðheilsusjóð en breytingin gerir ráð fyrir að 2,5 prósent gjaldsins fari í sjóðinn og 2,5 prósent til ríkislögreglustjóra til að sinna eftirliti með framkvæmd laganna.

Vilhjálmur Árnason hefur fulla trú á að frumvarpið gangi til þriðju umræðu og atkvæðagreiðslu.

Heldurðu að þú hafir meirihluta fyrir þessu í þinginu? „Þetta dansar einhvers staðar á línunni. Það eru einhverjir óánægðir ennþá,“ segir Vilhjálmur.

Ef þú ættir að veðja, hvað myndirðu veðja? „Ég hugsa að það muni rétt skríða í gegn. Ég hef trú á því.“ 

Ólína Þorvarðardóttir situr í allsherjar- og menntamálanefnd fyrir Samfylkinguna. Hún segir að í málinu takist á sjónarmið um verslunarfrelsi annars vegar og velferð hins vegar.

„Það er enginn vafi á því að þeir sem aðhyllast jafnaðarstefnu og félagslegt réttlæti þeir velja auðvitað velferðarsjónarmiðin þó ég skilji ég vel að margir þingmenn hafi verið tvístígandi í málinu fram að það þessu. Ég var það til dæmis sjálf.“

Ólína segir sjálfsagt að hleypa málinu í atvæðagreiðslu.„Ég hef alltaf verið mótfallin fundatæknilegum bolabrögðum þannig að ég geri enga athugasemd við að málið komist í eðlilega umfjöllun hér í þinginu og afstaða þingsins komi fram.“