SPES

Tilfinning manna þegar kemur að stjórnmálum er dularfullt fyrirbæri. Rök, upplýsingar, jafnvel áróður fer oft fyrir ofan garð og neðan og ristir ekki djúpt. En það er rödd í brjóstum okkar eða hjarta eða hvar sem brjóstvitið góða býr - rödd sem talar til okkar og við hlustum.

Þegar ég las fréttablaðið sveittur á þrekhjólinu mínu snemma í morgun og sá að Katrín Jakobsdóttir væri að íhuga framboð til forseta lýðveldisins tók hjarta mitt kipp og röddin - kannski af því ég nota latínu af og til í starfi mínu og trúarlífi - sagði hátt og skýrt SPES! Latneska orðið SPES þýðir von á íslensku. Það er von!