„Var Sharapova með kransæðasjúkdóm?“

Teitur Guðmundsson, læknir, var gestur í Bítinu á Bylgjunni í morgun til að ræða mál tenniskonunnar Mariu Sharapovu sem viðurkenndi í fyrradag að hún hefði fallið á lyfjaprófi.

Efnið meldonium fannst í Sharapovu en hún hefur notað það í tíu ár af heilsufarsástæðum. Hún sagði hins vegar á blaðamannafundi að það hefði farið fram hjá henni að efnið meldóníum hafi verið sett á bannlista um áramótin.

Sjá einnig: Hvað er meldóníum?

„Síðustu tíu ár hef ég fengið lyfið mildronate frá fjölskyldulækninum. Er mér var tilkynnt að ég hefði fallið á lyfjaprófi þá komst ég að því að þetta lyf er einnig kallað meldonium. Ég vissi það ekki.“

Teitur sagði í viðtalinu, sem má heyra í heild sinni hér fyrir ofan, að Sharapova sé íþróttamaður í fremstu röð sem hafi verið lengi á toppnum og unnið allt sem hægt er að vinna, auk þess að þéna miklar fjárhæðr.

„Svo kemur fram að hún hefur að eigin sögn verið að taka þetta lyf í tíu ár. Hún viðurkennir það,“ sagði Teitur.

Eigum við að trúa Sharapovu?

„Eigum við að trúa því þegar þessi kona, sem að mínu viti hefur skrökvað upp í opið geðið á heiminum, að hún hafi ekki haft hugmynd um að hugsanlega væri hún að taka lyf sem myndi hafa áhrif á hennar íþróttamannslegu getu?“

„Það er alveg klárt að lyfið virðist hafa þá verkun. Enda er búið að setja það inn á listann [yfir ólögleg lyf],“ bætti Teitur við.

Sjá einnig: Tennisdrottning hrynur af stalli

„Þetta hefur ítrekað gest í gegnum tíðina. Það er í lagi að nota eitthvað svo lengi sem það er á listanum. Svo þegar það kemur á listann, þá eru sumir sem fatta það ekki og falla.“

„Á hverju ári bætast við lyf. Ekki bara sterar, heldur hormón og ýmislegt annað. Örvandi efni. Það er ótrúlegt magn af efnum á listanum sem fólk getur notað til að bæta árangur sinn,“ segir Teitur og bendir á að íþróttamenn hafi gengið svo langt að nota krabbameinslyf til að fela notkun á testósteróni.

Þáttur læknanna

„Það eru svo margir að eltast við að bæta árangur sinn að þeir gera sér ekki grein fyrir aukaverkunina sem hlýst af notkun lyfjanna - fyrir utan siðferðislega þáttinn sem fylgir því að svindla,“ segir Teitur og nefnir að mögulegar aukaverkanir, svo sem stækkun hjartans, geðsveiflur, beinvöxt, hækkun blóðþrýstings auk þess sem að mörg lyf geti virkað sem bensín á krabbamein.

Sjá einnig: Sharapova átti hugsanlega að vita betur

Íþróttamennirnir sjálfir bera á endanum ábyrgð á því hvað fer inn í þeirra líkama en Teitur segir að það verði að velta fyrir sér hlutverki lækna þeirra.

„Ef þú hefur verið læknir Sharapovu í tíu ár og gefið henni lyf sem eiga að meðhöndla hjartasjúkdóm og blóðþurrð í hjartavöðva af því að þú ert með kransæðasjúkdóm ... heldur þú að þessi kona sé með kransæðasjúkdóm? Hvers konar della er þetta eiginlega?“