SS rannsakar hvort eitthvað af Mars-súkkulaðinu hafi farið í verslanir hér á landi

„Við erum að rannsaka þetta alveg ofan í kjölinn,“ segir Gunnar Grétar Gunnarsson, deildarstjóri innflutningsdeildar hjá Sláturfélagi Suðurlands, um innköllunina frá sælgætisframleiðandanum Mars í 55 löndum.

Sláturfélag Suðurlands flytur inn vörur frá Mars en innköllunin í gær náði til Mars- og Snickers-súkkulaðistykkja eftir að plast fannst í súkkulaðistykkjum fyrirtækisins í gær. Í tilkynningu frá matvælaeftirliti Hollands kom fram að plastið geti leitt til köfnunar.

Gefinn var út listi með vörum sem voru innkallaðar og segir Gunnar Grétar í samtali við Vísi að nokkrar vörur sem komu með skipi til Íslands í gær hafa verið á þessum lista. „Við erum búin að koma í veg fyrir að það fari út úr húsi,“ segir Gunnar.

Hann segir mögulegt að eitthvað af þessum vörum hafi verið sendar í örfáar búðir og verið sé að rannsaka hvort það sé rétt ágiskun.

„Þetta er ný framleidd vara. Það sem við erum að afhenda frá okkur er á stimplum sem eru fyrir þessa dagsetningu, það er það sem við vitum í dag,“ segir Gunnar Grétar.