Hættu við að ráða upplýsingafulltrúa í miðjum klíðum

Enginn upplýsingafulltrúi er starfandi hjá Landhelgisgæslunni þrátt fyrir að stofnunin hafi auglýst eftir umsækjendum um starfið síðastliðið vor. Landhelgisgæslan fékk fyrirtækið Góð ráð, sem sérhæfir sig í stjórnendaleit, til að sjá um ráðningarferlið en þegar nokkuð var liðið á ferlið ákvað Landhelgisgæslan að hætta við allt saman.

Var því verkefnum sem áttu að fylgja starfi upplýsingafulltrúans skipt á milli starfsfólks Landhelgisgæslunnar, að því er fram kemur í svari Svanhildar Sverrisdóttur, skrifstofustjóra Landhelgisgæslunnar, til Vísis um málið.

Alls sóttu 84 um stöðuna, ellefu voru boðaðir í viðtal og af þeim var fimm boðið að koma í annað viðtal áður en ákveðið var að hætta við ráðninguna.

Svanhildur segir ýmsar ástæður fyrir þeirri ákvörðun.

Ekki svo að umsækjendur hafi ekki verið hæfir

„Það kom í ljós eftir að ferlið var hafið og rætt var við mögulega kandídata að skynsamlegt væri að endurskoða skipan þessara mála hjá Landhelgisgæslunni og þar á meðal starfsskyldur upplýsingafulltrúans. Það varð því niðurstaðan að skipta þessum verkefnum á milli starfsfólks hér innanhúss og hagnýta þá vinnu sem fór í undirbúning ráðningarferlisins til frekari stefnumótunar um framtíðarskipan samskiptamála Landhelgisgæslunnar. Sú vinna er enn í gangi,“ segir Svanhildur.

Aðspurð hvað það var við ferlið sem varð til þess að Landhelgisgæslan ákvað að endurskoða skipan þessara mála segir Svanhildur Landhelgisgæsluna einfaldlega hafa viljað móta upplýsingamálin betur og skilgreina nánar starfsskyldur upplýsingafulltrúans áður en lengra yrði haldið.

Aðspurð hvort það hafi verið mat Landhelgisgæslunnar og Góðra ráða að enginn umsækjendanna hefði verið nógu hæfur til að gegna stöðunni svarar hún því neitandi. 

Fyrirtækið Góð ráð er systurfyrirtæki Góðra samskipta. Kostnaður Landhelgisgæslunnar vegna vinnu Góðra ráða nam 490 þúsund krónum, að sögn Svanhildar.