Skilorð fyrir að blekkja meintan vændiskaupanda

Hæstiréttur hefur staðfest dóm yfir ungri stúlku sem dæmd var í tveggja ára skilorðsbundið fangelsi fyrir aðild sína að fjársvikamáli þar sem hún, í félagi við tvö aðra, blekkti meintan vændiskaupanda til þess að greiða stúlkunni 40.000 krónur í reiðufé fyrir kynlífsþjónustu.

Málið teygir anga sína aftur til 22. janúar 2013 þegar maðurinn hringdi í lögregluna og sagðist hafa verið skorinn. Hann var alblóðugur þegar lögreglumenn komu á vettvang og með stórt sár á hálsi.

Sjá einnig: „Ég þorði ekki öðru en að segja já“

Hafði maðurinn mælt sér mót við stúlkuna þetta kvöld í Kópavogi. Hringdi hann í símanúmer sem hún hafði áður gefið upp þegar þangað kom. Stúlkan kom út að bifreið hans og greiddi hann henni 40.000 krónur fyrir kynlífsþjónustu. Sagðist hún þá þurfa að skreppa í burtu.

Ruddust þá Gísli Þór Gunnarsson og Jón Einar Randversson inn í bíl hans og gerðu tilraun til þess að ræna hann. Ránstilraunin fór hinsvegar út um þúfur þegar Gísli Þór skar manninn á háls.

Sjá einnig: Auglýstu vændi og réðust á kaupenda

Stúlkan sagði fyrir Héraðsdómi á sínum tíma að tilviljun hafi ráðið því að hún hafi hitt ákærðu þennan dag og hafi hún ekki þorað öðru en að taka þátt í fjársvikabroti þeirra. Var hún dæmd í tveggja ára skilorðsbundið fangelsi fyrir aðild sína að málinu.

Gísli Þór var dæmdur í tveggja ára fangelsi fyrir fjársvik, tilraun til ráns og árás með hníf fyrir þátt sinn í málinu.

Ríkissaksóknari áfrýjaði dóminum til Hæstaréttar og var þess krafist að stúlkunni yrði gerð refsing. Hæstiréttur staðfesti hinsvegar dóm Héraðsdóms en gerði athugasemdir við að verulegur dráttur hafi orðið á meðferð málsins eftir að héraðsdómur var kveðinn upp 16. apríl 2015. Segir Hæstiréttur að ekki hafi verið gefnar haldbærar skýringar á þessum drætti og sé hann aðfinnsluverður.

Dóm Hæstaréttar má lesa í heild sinni hér.