Marsspá Siggu Kling – Fiskur: Ferð inn í dásamlegan mánuð og kvíðinn leysist upp

Elsku hjartnæmi og áhrifaríki fiskurinn minn. Upp á síðkastið hefur kvíðinn nagað þig og þú hefur áhyggjur af ótrúlegustu vitleysu, það er hreinlega eins og þú sért að reyna að finna upp eitthvað til þess að hafa áhyggjur af. Og þú ert svo dásamlega snjall í því!

Mundu það elskan mín að meðvirkni virkar aldrei og þú ert búinn að sveiflast frá því að vera meðvirkur til þess að vera svo sjálfstæður, það er það sem er að skapa þessa erfiðleika og áhyggjur hjá þér.

Það er hinn gullni meðalvegur, að gera bara sitt besta og leyfa öðrum að taka svolítið ábyrgð á sjálfum sér sem þú skalt reyna að feta.

Ég get með sanni sagt að þú sért að fara inn í dásamlegan mánuð núna og þú munt finna að kvíðinn verður að engu.

Þú munt sjá að þú hefur réttu tökin og ef þú horfir til baka þá virðist fylgja því eitthvað álag þegar þú ert að fara inn í fæðingarmánuðinn þinn. Þú átt erfiðara með að finna ótrúlega gleði í augnablikinu en endorfínið á eftir að pumpast út í allt æðakerfið þitt og þú sýnir óviðjafnalega takta í mars!

Það er nefnilega þannig með þig, að þó að þú haldir að þú kunnir ekki steppdans þá getur þú steppað. Þú hefur svo mikla tónlistarhæfileika og mikinn ryþma og ert þar af leiðandi frábær elskhugi.

Þú ert mörgum svo rosalega kær og átt svo marga aðdáendur og ef þú hugsar eins og aðdáendurnir þínir hugsa um þig til þín sjálfs þá hefur þú ekkert að óttast.

Þú þarft frelsi til þess að fara þínar eigin leiðir en það er samt mikilvægt að þú skoðir það virkilega núna hver fyrirmynd þín er. Hver er það sem þú lítur upp til? Þú getur kallað á hvaða orku sem þig langar til að öðlast ef þú bara veist hvað það er sem þig vantar. Fyrirmyndin mín er Ellen DeGeneres og Jón Gnarr. Finndu út hver er þín og þá veistu betur, hver þú ert og hvert þú vilt fara.

Mars er þinn mánuður elsku fiskur, hann er þín áramót og þín speglun á nýju upphafi. Þetta verður miklu auðveldara en þú bjóst við svo notaðu þetta stress sem þú hefur byggt upp og breyttu því í orku til þess að láta þig fljúga enn hærra.

Þú býrð yfir svo miklum og sterkum hæfileikum til þess að elska hjartans fiskurinn minn, nýttu þá vel!

Frægir fiskar: Elísabet Ásberg listamaður, Beggi hans Pacasar, Baltasar Kormákur leikstjóri, Díana Ómel fjöllistakona, Árni Johnsen, fyrrverandi þingmaður, Albert Einstein, Sigmundur Davíð Gunnlaugsson forsætisráðherra, Vigdís Hauksdóttir þingkona, Ilmur Kristjánsdóttir leikkona, Svavar Örn engill, Páll Óskar poppstjarna, Katla Sign.