Áforma höfðingjasetur í Mosfellsbæ fyrir sýningu um gullöld Íslendinga

Unnið er að því kanna jarðveg fyrir verkefni sem nefnt er Höfðingjasetur og á að vera í landi Helgafells í Mosfellsbæ. Höfðingjasetrinu er ætlað að kynna gullöld menningar Íslendinga á tólftu öld.

Að baki fyrirspurninni til bæjarins eru kvikmyndagerðarmaðurinn Halldór Þorgeirsson og Úlfur Hróbjartsson, formaður Siglingasambands Íslands. Segjast Halldór og Úlfur hafa náð samkomulagi við eiganda tiltekinnar spildu í landi Helgafells um kauprétt sem gildi fram í apríl. Vilji þeir kanna hug skipulagsyfirvalda áður en fleiri skref verði stigin.

„Upphaf íslenskrar menningar má rekja til miðalda er Íslendingar hófu að rita handrit á móðurmáli sínu,“ segir í bréfi Halldórs og Úlfs til bæjarráðs Mosfellsbæjar. Segja þeir Íslendinga enn skilgreina sig út frá tungu og sögum þessara handrita. Þessu sé lítt haldið á lofti.

„Það er helst í Árnastofnun og Þjóðmenningarhúsi sem hægt er að kynna sér þessa þætti en hvort tveggja er mjög þurr og þröng nálgun á þetta blómaskeið Íslandssögunnar,“ skrifa tvímenningarnir sem taka fram að hugmyndin snúist ekki um víkinga og landnámsmenn sem hrakist hafi til Íslands upp á von og óvon heldur það sem gerðist tíu kynslóðum síðar.

„Þá eru Íslendingar hættir að vera flóttamenn og farnir að að skapa menningu sem síðar hefur verið nefnd gullöld þjóðarinnar,“ segir í bréfi Halldórs og Úlfs. Með Höfðingjasetrinu vilji þeir gera þessu tímabili góð skil.

„Ætlunin er að reisa skála, kirkju, smiðju og ritstofu “ eins og þau kunna að hafa verið við upphaf ritaldar 1130. Í húsunum verður lifandi sýning, þar sem handverksmenn sýna handverk sitt og lifandi leiðsögn leiðir fólk um svæðið,“ er áformunum nánar lýst. „Á þennan hátt fá gestir innsýn í heim íslenskra miðalda, verklag, lifnaðarhætti og menningu.“

„Ekki er ætlunin að vera eingöngu með sýningarhald í Höfðingjasetrinu því þar á einnig að vera veitingasala og minjagripasala,“ segir í bréfinu sem tekið hefur verið fyrir í bæjarstjórn sem samþykkti að fela Haraldi Sverrissyni bæjarstjóra að ræða við fyrirsvarsmenn Höfðingjasetursins.