Myndband: McLaren setur í gang

McLaren og Honda endurnýjuðu kynni sín í Formúlu 1 fyrir síðasta tímabil. Árangurinn lét á sér standa og liðið náði aðeins í 27 stig og níunda sæti í keppni bílasmiða.

Honda vélin var að margra mati einn helsti sökudólgurinn fyrir getuleysi bílsins. Nú telur Honda að vélin hafi náð miklum framförum í vetur.

McLaren þarf á Honda að halda og Honda hefur orðspori að bjarga. Það er því mikið undir hjá báðum aðilum fyrir tímabilið.

Ökumenn McLaren liðisins, Jenson Button og Fernando Alonso eru líklega orðnir langþreyttir á því að vera aftarlega á ráslínu. Alonso lét óánægju sína í ljós á síðasta tímabili.

„Ég er eins og viðvaningur hérna. Þetta er eins og GP2 vél, þetta er vandræðalegt,“ sagði tvöfaldi heimsmeistarinn. Ætla má að þeir reyni að flýja McLaren hratt ef vélin verður ekki betri í ár.

Hér fyrir neðan má hlusta á fyrstu ræsingu Honda vélarinnar sem verður um borð í MP4-31 bíl McLaren liðsins. Mikil spenna er um hversu miklum framförum vélin hefur tekið.

First fire-up: hear the #McLarenHonda MP4-31 as it roars into action at the #MTC.https://t.co/YrS9u6vElJ

— McLaren (@McLarenF1) February 14, 2016