Olíufélög þurfa að greiða 1,5 milljarða í sektir vegna samráðs

Hæstiréttur hefur staðfest úrskurð áfrýjunarnefndar samkeppnismála yfir olíufélögunum frá árinu 2005. Olíufélögin Olís, Skeljungur og Olíufélagið (nú Ker) þurfa því að greiða 1,5 milljarða króna sekt vegna alvarlegra brota á samkeppnislögum.

Málið nær langt aftur en 28. október 2004 komst Samkeppnisráð, forveri Samkeppniseftirlitsins að Olís, Skeljungur og Olíufélagið hefðu framið mjög alvarleg brot á samkeppnislögum.

Sjá einnig: Ríkið sýknað af kröfu olíufélaganna

Olíufélögin skutu úrskurðinum til héraðsdóms árið 2005 en málarekstur fyrir héraðsdómi tók langan tíma. Héraðsdómur úrskurðaði í mars 2012 að félögin hefðu haft með sér ólögmætt samráð en úrskurður áfrýjunarnefndar var felldur úr gildi vegna þess að talið var að brotið hefði verið á andmælarétti olíufélaganna.

Þessu skaut Samkeppniseftirlitið til Hæstaréttar sem vísaði máli félaganna frá héraðsdómi vegna verulegra galla á málatilbúnaði þeirra. Í kjölfar dóms Hæstaréttar frá janúar 2013 höfðuðu olíufélögin ný dómsmál sem miðuðu aftur að því að fá framangreindum úrskurði áfrýjunarnefndar hnekkt.

Sjá einnig: Umfangsmestu brot á samkeppnislögum í sögunni

Hæstiréttur fellst á það í dag með samkeppnisyfirvöldum að olíufélögin hafi framið mjög alvarleg brot á samkeppnislögum og að hæfilegar sektir félaganna skuli nema samtals 1,5 milljörðum króna.

Skiptu á milli sín markaðnum fyrir olíuvörur

Samráð olíufélaganna var margskonar og stóð yfir að mati Samkeppniseftirlitisins frá óslitið frá árinu 1993 til ársloka 2001. Höfðu þau meðal annars samráð um um verðlagningu á fljótandi eldsneyti, gasi, smurolíu og tengdum vörum. Auk þess höfðu olíufélögin með sér umfangsmikið samráð um gerð tilboða í tengslum við formleg útboð en dæmi um þolendur þessa samráðs olíufélaganna voru Reykjavíkurborg, Síminn og Landhelgisgæslan.

Sjá einnig: Brot olíufélaganna var eins ófyrirleitið og hugsast getur

Olíufélögin gripu einnig til margs konar aðgerða í því skyni að skipta á milli sín markaðnum fyrir olíuvörur hér á landi. Aðgerðirnar miðuðu að því að skipta á milli félaganna markaðnum eftir landsvæðum, viðskiptavinum eða eftirsölu og magni. Félögin náðu t.d. samkomulagi um að Skeljungur myndi sitja einn að bensínsölu í Grindavík og þau skiptu með sér viðskiptum t.d. á Ísafirði og Stykkishólmi.

Dómur Hæstaréttar í máli gegn Olíuverzlun Íslands hf.

Dómur Hæstaréttar í máli gegn Ker hf.

Dómur Hæstaréttar í máli gegn Skeljungi hf.