Viðskipti innlent

Glu setur allt að milljarð í Plain Vanilla

Sæunn Gísladóttir skrifar
„Við hlökkum til að nýta okkur þær dreifingarleiðir sem Glu hefur yfir að ráða og einnig sérþekkingu þeirra og reynslu til þess að stækka notendahóp QuizUp’s," segir
Þorsteinn B. Friðriksson, forstjóri og stofnandi Plain Vanilla.
„Við hlökkum til að nýta okkur þær dreifingarleiðir sem Glu hefur yfir að ráða og einnig sérþekkingu þeirra og reynslu til þess að stækka notendahóp QuizUp’s," segir Þorsteinn B. Friðriksson, forstjóri og stofnandi Plain Vanilla.
Tölvuleikjaframleiðandinn Glu Mobile Inc, sem sérhæfir sig í að framleiða leiki fyrir snjallsíma og spjaldtölvur, ætlar að fjárfesta í íslenska tölvuleikjafyrirtækinu Plain Vanilla fyrir allt að 7,5 milljónir bandaríkjadala sem samsvarar um 970 milljónum króna.

Glu Mobile Inc er skráð í bandarísku NASDAQ kauphöllina en stærstu hluthafar Glu eru ýmsir fjárfestingarsjóðir. Kínverska fyrirtækið Tencent, sem er stærsta netfyrirtæki Asíu og það fjórða stærsta í heimi, keypti 15% hlut í Glu fyrir um 15 milljarða króna í apríl í fyrra. En Tencent er einnig á meðal stærstu hluthafa í Plain Vanilla.

Glu og Plain Vanilla ætla að taka höndum saman og einblína m.a. á þróun QuizUp sjónvarpsþáttarins en tilkynnt var um það síðasta haust að stærsta sjónvarpsstöð Bandaríkjanna, NBC, hefði ákveðið að framleiða 10 þátta seríu sem byggir á QuizUp. Í kjölfarið keypti ITV fjölmiðlarisinn, sem rekur hátt í tíu sjónvarpsstöðvar í Bretlandi, réttinn að QuizUp spurningaþættinum þar í landi. Standa vonir til þess að QuizUp spurningaþáttur verði sýndur um allan heim en í honum etja þátttakendur í upptökuveri kappi við sjónvarpsáhorfendur sem sitja heima í stofu og eiga sigurvegarar möguleika á að vinna sér inn háar upphæðir. Búist er við því að fjöldi fólks muni sækja QuizUp appið eftir að þættirnir fara í loftið.

Niccolo de Masi, forstjóri Glu, mun taka sæti í stjórn QuizUp en þar að auki mun Glu öðlast kauprétt á öllu hlutafé Plain Vanilla á fyrirfram umsömdu verði. Kauprétturinn gildir í 15 mánuði frá fjárfestingunni sem nú hefur verið tilkynnt um. Fyrirtækin tvö ætla að vinna saman að leiðum til þess að sá stóri og fjölbreytti hópur fólks sem spilar QuizUp á hverjum degi skili Plain Vanilla auknum tekjum. Þetta verður gert með kynningarsamstarfi, auglýsingum og nýjum spilunarmöguleikum í leiknum.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.