Uppboð tollkvóta stenst skoðun ESB

Uppboð íslenskra stjórnvalda á tollheimildum búvara frá Evrópusambandinu (ESB) brýtur ekki í bága við tollasamkomulag Íslands og ESB frá árinu 2007. Þetta er álit sérfræðinga innan landbúnaðardeildar sambandsins.

„Evrópusambandið semur við ríki um frjálsa verslun sem þýðir að flutt sé ákveðið magn af vörum á milli landa, en þegar komið er inn fyrir landamærin þá skiptir Evrópusambandið sér ekki af því hvernig farið er með þessar vörur eða heimildir,“ segir Klemens Ólafur Þrastarson, upplýsingafulltrúi sendinefndar ESB á Íslandi.

Félag atvinnurekenda (FA) hefur gert athugasemdir við framkvæmdina hér og bent á að útboðsgjaldið sem íslensk innflutningsfyrirtæki þurfa að greiða til íslenskra stjórnvalda sé svo hátt að ávinningur af tollfrjálsum innflutningi hverfi að stórum hluta. Til dæmis sé útboðsgjald alifuglakjöts svo hátt að álíka mikið kosti að flytja inn kjúkling frá ESB á tollfrjálsum kvóta og almennum tolli. Aðspurður segir Klemens Evrópusambandið sjálft ekki leggja slíkar álögur á íslenskar vörur, eða á innflutning yfirleitt.

FA hefur sagt vandséð hvernig framkvæmdin stæðist ákvæði í samningi Íslands og ESB þar sem kveðið er á um að gerðar séu ráðstafanir til að tryggja að ávinningi sem samningsaðilar veiti hvor öðrum verði ekki stefnt í hættu „með öðrum takmarkandi innflutningsráðstöfunum“.

Klemens segir umrætt ákvæði fyrst og fremst snúa að tæknilegum hindrunum við innflutning varnings. Þar undir kunni að vera „ýmsar skapandi eða nýstárlegar heilbrigðiskröfur“ líkt og dæmi séu um að komið hafi upp í öðrum löndum. „Þarna er átt við raunverulegar hindranir, þannig að vörurnar komist ekki í gegn. En hvað Evrópusambandið varðar þá komast þessar vörur í gegn og svo er það undir íslenska ríkinu komið hvernig það útdeilir þessum innflutnings­heimildum.“