Höfuðlaus höfuðborg

Meirihluti borgarstjórnar Reykjavíkur virðist vera haldinn þeirri grillu að Reykjavíkurflugvöllur og rekstur hans sé að öllu leyti undir hans stjórn og umsjá. Aðrir landsmenn ættu því að hafa vit á því að skipta sér ekki af hlutum, sem koma þeim ekki vitundar­hót við og þegja í staðinn. En málið er ekki svona einfalt eins og þessir illa upplýstu meirihlutafulltrúar halda sökum þess að Reykjavíkurflugvöllur ásamt sinni ómissandi neyðarbraut 06/24 er flugvöllur allra landsmanna og ætti því helst að bera nafnið þjóðarflugvöllur.

Þessi yfirgangur og ofstæki þeirra hæstráðandi í borgarstjórnarmeirihlutanum kom heldur betur berlega í ljós þegar arkitektinum Erni Sigurðssyni var falið það lítt öfundsverða hlutverk að taka skóflustungu fyrir risastóru hóteli á helgasta stað í Vatnsmýrinni. Að þeirra viti er hægðarleikur einn að finna annan stað fyrir nýjan flugvöll eins og t.d. í Hvassahrauni í næsta nágrenni við Keflavík, sem Sverrir nokkur Ólafsson tók svo djúpt í árinni að kalla „Flugvöll fáránleikans“ og hitti þar með naglann á höfuðið.

Ekki má gleyma einu mikilvægu atriði varðandi Valsmenn. Þeir stóðu vitanlega heilshugar að baki borgarstjórninni í þessu glæfralega máli eða með öðrum orðum voru með puttana í spilinu, enda leyfði bágborinn fjárhagur þeirra ekki annað eins og hermt er.

Snúum nú okkur að peningahliðinni og væntanlegum byggingarkostnaði við slíkt lúxushótel í Vatnsmýrinni og öðrum óhjákvæmilegum afleiðingum sem myndu fylgja í kjölfarið. Sérfróðir menn telja að það séu að minnsta kosti 15-20 metrar niður á fast í Vatnsmýrinni. Sturlu Friðrikssyni erfðafræðingi, sem er nú nýlátinn, þótti ekki ósennilegt að sjálf Reykjavíkurtjörn myndi þorna upp við þetta fáránlega fikt. Ef sú yrði raunin og spá hans rætist að fullu þá hlýtur sú spurning óhjákvæmilega að vakna hvað yrði heppilegast að gera við sjálfan uppþornaða grunninn. Væri ekki alveg tilvalið að reisa þar eins konar eftirlíkingu af Tívolíinu í Kaupmannahöfn? Yrði það ekki æðstu embættismönnum sem nú sitja í ráðhúsinu og öllu stjórna sannkallað augnayndi og afþreying? Lesandi góður, ég þykist vita að þú hlýtur að sjá að þessari tillögu er hér slegið fram í hálfkæringi.

En hins vegar yrði hlutskipti Mýflugs stórt alvörumál ef Hvassa­hraun tæki við núverandi starfsemi Reykjavíkurflugvallar því þar yrði engin öryggisbraut, svokölluð m.a. NA/SV til að bjarga dauðsjúku fólki utan af landi og þar með myndi hið göfuga og fórnfúsa litla flugfélag líklega heyra sögunni til. En ég get ekki stillt mig um að bæta aðeins einni athugasemd við. Verði þessi þrælgagnrýndi staður í rauninni fyrir vali borgarstjórnarmeirihlutans fyrir nýjan flugvöll er það ótvíræð sönnun þess að heilbrigð skynsemi á þar engan veginn upp á pallborðið.

P.s. Það væri líka óðs manns æði að fara að flytja íslenska raforku til útlanda eins og Páll Steingrímsson hefur bent svo réttilega og hressilega á.