Smábátasjómenn sömdu um kaup á sjö milljónum lítra af olíu

Landssamband smábátaeigenda (LS), Skeljungur hf. og Sjávarkaup hf., hafa gert með sér samning fyrir hönd á þriðja hundrað smábátaeigenda um kaup á sjö milljónum lítra af eldsneyti hið minnsta. Samningurinn tók gildi í gær og gildir til 31. desember 2017.

Auk afsláttar á olíu á báta tekur samningurinn einnig til smurolíu, smurefna og eldsneytis á bifreiðar félagsmanna.

Fram kemur á heimasíðu LS að samningurinn hefur átt sér töluverðan aðdraganda þar sem LS hefur um nokkurt skeið vaktað olíuverð hjá olíufélögunum þremur Skeljungi, N1 og OLÍS. Markmiðið var að efla samkeppni og ná þannig fram lægra verði fyrir smábátaeigendur. Í haust var ákveðið að reyna að knýja fram lægra innkaupsverð með útboði. LS leitaði í því skyni til Sjávarkaupa hf., sem sérhæfir sig í útboðum, innkaupum, innflutningi og eftirfylgni útboða.

Fjórum olíufélögum var gefinn kostur á að bjóða í kaupin. N1 og Olís skiluðu ekki inn tilboði. Með samningnum fá smábátaeigendur bætt kjör og formúluverð sem er beintenging við þróun heimsmarkaðsverðs og gengis sem er gríðarlega stór áfangi fyrir félagsmenn í LS til bættra kjara, segir á heimasíðu LS.