Þriggja mánaða fangelsi fyrir kynferðisbrot

Héraðsdómur Reykjaness hefur dæmt mann í þriggja mánaða fangelsi fyrir að hafa sært blygðunarsemi tveggja kvenna með því að aka bíl sínum ítrekað upp að þeim og stöðvað hann fyrir framan þær svo þær sáu hann fróa sér.

Fresta skal fullnustu refsingarinnar og fellur hún niður að liðnum tveimur árum frá dómsuppsögu haldi ákærði almennu skilorði.

Brotið var framið í apríl árið 2014. Í dómnum kemur fram að maðurinn hafði ekki áður gerst sekur um refsiverða háttsemi, auk þess að tillit var tekið til ungs aldurs mannsins.

Maðurinn játaði þá háttsemi sem hann var saksóttur fyrir. Hann var jafnframt dæmdur til að greiða þóknun skipaðs verjanda síns, eða 102.300 krónur.