Á erfitt með að finna leiguhúsnæði og vinnu fimm árum eftir að hann lauk afplánun í Brasilíu

Karl Magnús Grönvold, sem sat í fangelsi í Brasilíu fyrir fíkniefnasmygl fyrir nokkrum árum, segist enn vera að glíma við afleiðingar þess, en hann var handtekinn árið 2007 með sex kíló af kókaíni í fórum sínum og hlaut þriggja ára dóm. Karl segist til að mynda eiga erfitt með að finna sér leiguhúsnæði og vinnu.

„Ég var til dæmis búinn að gera munnlega samninga við fjóra mismunandi leigusala en svo kemur að því að ég þarf að gefa upp nafn og kennitölu. Síðan er bara hringt daginn eftir og sagt „Nei, ég get ekki farið í þetta.“ Þetta gerðist bara seinast núna um daginn, 5 árum eftir að ég lauk afplánun,“ segir Karl en hann ræddi málið í Harmageddon.

Eins og kunnugt er situr núna íslenskt par í gæsluvarðhaldi í Brasilíu vegna gruns um að hafa ætlað að smygla fjórum kílóum af kókaíni úr landi. Karl ráðleggur fólkinu að forðast allt umtal þegar þau koma heim en hann var nokkuð áberandi eftir að hann lauk afplánun og gerðu hann og Jóhannes Kr. Kristjánsson til að mynda bókina Brasilíufanginn um reynslu Karls úr fangelsinu.

„Bókin átti að vera uppgjör við þessa dvöl en ég hafði enga hugmynd um hvaða afleiðingar þetta myndi hafa. Það eina sem ég get gert er að halda áfram og reyna að gera það besta sem ég get gert og tekið réttar ákvarðanir. [...] En ef ég gæti snúið til baka þá hefði ég aldrei farið í þessa ferð, ég hefði ekki farið í þessa bók, ekki í viðtöl, sem sagt ekki farið svona opinbert út með þetta,“ segir Karl.

Hlusta má á ítarlegt viðtal Harmageddon við Karl, sem er í tveimur klippum, í spilurunum hér í fréttinni.