Fékk blóðtappa í læri vegna pillunnar

Íslensk kona vill að fræðsla um mögulega fylgikvilla hormónagetnaðar-varna sé aukin, en hún greindist fyrir stuttu með blóðtappa í læri, sem hægt er að rekja til getnaðarvarnarpillu. Það tók hana mörg ár að fá greiningu á veikindum sínum.

Áróra Owen byrjaði á pillunni árið 2006, þá sextán ára gömul. Í lok desember síðastliðnum fundust í bláæð í vinstra læri hennar tveir blóðtappar sem læknar telja beina afleiðingu notkunar getnaðarvarnarpillunnar.

Hún segir mikinn létti að fá greiningu á veikindum sínum en undanfarna mánuði hefur hún leitað fjórum sinnum á bráðamóttöku en þrisvar verið vísað frá. Áróra byrjaði fyrst að fá verki þremur mánuðum eftir að hún byrjaði á pillunni fyrir tíu árum.

Hún er nú á blóðþynningslyfjum til reynslu en ef ástand hennar batnar ekki á næstu mánuðum þarf hún að gangast undir aðgerð. Áróra deildi sögu sinni á facebook í gær en þar hafa skapast umræður um málið og fleiri konur lýst svipaðri reynslu.

Hún segir að ábyrgðin þurfi að vera hjá lækninum þegar pillunni er ávísað. Læknirinn sem skrifaði upp á pilluna fyrir hana hafi til að mynda ekki spurt hvort saga hafi verið verið um blóðtappa í fjölskyldunni.