„Allt blossandi og blikkandi í rakettum“ þegar fyrsta barn ársins kom í heiminn

Hildur Erna Sigurðardóttir og Steinar Sigurðsson eignuðust sitt fyrsta barn þann 1. janúar en það var líka fyrsta barnið sem fæddist á Íslandi í ár. Engu mátti muna að drengurinn, sem var þrettán og hálf mörk og 51 sentímeter, kæmi þó í heiminn rétt fyrir áramótin.

Drengurinn, sem enn hefur ekki verið nefndur, kom í heiminn undir dynjandi flugeldasprengingum á fæðingardeild Landspítalans, eina mínútu yfir miðnætti á nýársnótt. 

„Já hausinn var kominn aðeins fyrir miðnætti, búkurinn eftir, en það eru tærnar sem gilda og tærnar komu eftir miðnætti.,“ segir Hildur. 

„Þetta getur breytt öllu; hvaða vini hann eignast og kærustur, eftir því í hvaða árgangi hann er og svo verður hann bestur í íþróttum, samkvæmt Freakonomics er það ekki?“ segir móðirin í léttum tón.

Foreldrarnir segja að það hafi verið sérstök upplifun að fæða barn með útsýni yfir upplýstan himininn.

„Svo var það svolítið klikkað að vera þarna á fæðingarstofunni með útsýnið yfir Hallgrímskirkju og flugeldana á miðnætti, á mínútunni sem hann kemur út,“ segir Hildur og Steinar bætir við: „Við drógum bara frá og það var allt blossandi og blikkandi í rakettum.“