Sjúkraflug áætlar að lenda til norðausturs

Sjúkraflugvél, sem er að sækja tvo sjúklinga til Austurlands, hefur óskað eftir því að hin umdeilda neyðarbraut Reykjavíkurflugvallar verði höfð tilbúin til lendingar í kvöld, til norðausturs. Það er öfug stefna við þá sem brautin nýtist oftast við, sem er til suðvesturs í hvössum suðvestanáttum.

Flugvélin, sem er frá Mýflugi, lagði upp frá Akureyrarflugvelli klukkan 21.20 í kvöld áleiðis til Egilsstaða til móts við tvo sjúkrabíla. Annar sjúkrabíllinn er á leið frá Seyðisfirði með hjartasjúkling en hinn á leið úr Neskaupstað, einnig með hjartasjúkling.

Að sögn flugstjórans, Þorkels Ásgeirs Jóhannssonar, hafa aðstæður á Reykjavíkurflugvelli verið með þeim hætti í kvöld að hann telji að öruggast verði að lenda á braut 06, litlu neyðarbrautinni, til norðausturs. Hann segir vindhviður ná allt að 40 hnútum og vindáttin sé 90 gráður. Flugbraut 13 hafi verið í notkun en flugmenn sem lentu á henni hafi varað við ókyrrð við flugbrautarendann.

Sjúkraflugvélin lenti á Egilsstöðum laust fyrir klukkan 22 í kvöld. Hægt er að fylgjast með flugi hennar til Reykjavíkur á Flightradar24. Flugnúmerið er MYA77B. 

Uppfært 22.40: Flugvélin fór í loftið frá Egilsstaðaflugvelli klukkan 22.32. 

Uppfært 23.30: Flugvélin lenti á braut 06, svokallaðri neyðarbraut, til norðausturs, klukkan 23.25, eftir aðflug yfir Bessastaðanes.