Titringur á mörkuðum teygir anga sína til Íslands

Íslenska úrvalsvísitalan OMXI8 hefur lækkað um 1,91 prósent það sem af er degi. Mest nemur lækkunin í Marel, um 3,17 prósent í 440 milljóna króna viðskiptum. Síminn og Icelandair Group hafa líka lækkað um 1,89 prósent. Eina félagið sem hefur hækkað er Hagar, um 0,55 prósent í 231 milljóna króna viðskiptum.

„Ég held að þetta sé nú fyrst og fremst út af mörkuðum úti,“ segir Jóhann Gísli Jóhannesson, sjóðsstjóri hlutabréfa- og fyrirtækjaskuldabréfa hjá Gamma. Hann telur að menn hafi áhyggjur af því að það er búið að vera allt niður úti um allan heim. Áhrifin hafi smitast frá Kína og yfir í Evrópu og Bandaríkin. „Menn halda aðeins að sér höndum og vilja sjá hvernig þetta þróast.“

Markaðir í Evrópu hafa fallið um 3 prósent það sem af er degi. Það er rakið til mikils gerningaveðurs á mörkuðu í Kína þar sem hlutabréf féllu um 7 prósent eftir 30 mínútna viðskipti. Mörkuðum var lokað og óttinn teygir nú anga sína bæði til Evrópu og Bandaríkjanna.

Jóhann Gísli bendir á að markaðurinn hér heima hafi hækkað fyrstu þrjá daga ársins á meðan markaðir erlendis hafi verið niður á við.

Áhrifin á skuldabréfamarkaðinn hér heima eru minni. Jóhann Gísli bendir á að það hafi verið einhver sala í verðtryggða hlutanum sem sé afleiðing af olíulækkun. „Það dregur úr verðbólguvæntingum. Olíuverð er að hríðfalla þessa vikuna,“ segir Jóhann Gísli. Hann bendir þó á að úti í heimi séu skuldabréf að hækka. „Menn eru að færa sig úr hlutabréfum og yfir í skuldabréf.“