Rúmlega 250 manns tóku þátt í áheyrnarprufum Hard Rock

Færri komast að en vilja í um sextíu störf sem ráðið verður í hjá Hard Rock veitingastaðnum í Reykjavík. En hátt á þriðja hundrað manns mættu í atvinnuviðtal hjá fyrirtækinu í dag.

Áheyrnaprufur fyrir störf á veitingastaðnum Hard Rock café fóru þar fram í dag og var mikil stemning á staðnum.

„Í morgun vorur rúmlega 400 manns búnir að sækja um vinnu þannig það verður fjölmennt hérna í dag,“ segir Stefán Magnússon, framkvæmdastjóri Hard Rock á Íslandi.



Fólk á öllum aldri mætti í áheyrnarprufurnar. „Þetta er ekki spurning um að vera bestur heldur að vera áhugasamur og hafa gaman,“ segir Stefán.

Í boði eru ýmis veitinga- og þjónustustöf en prufurnar fóru fram í þremur þrepum.

Reksturinn verður á þremur hæðum í húsinu. Í kjallaranum verður tónleikastaður og á fyrstu hæð verður Hard Rock búðin. „Á annari hæðinni verður veitingastaðurinn. Þar verður sæti fyrir um 180 manns. Þetta verður rosalega flottur staður og það er mikil spenna að sjá hvernig þetta kemur allt saman út,“ segir Stefán.

Hard Rock veitingarstaðir eru 168 talsins, um allan heim.

Staðurinn í Lækjargötu opnar í október en hann er 1000 fermetrar og mun taka yfir 250 manns í sæti. Umsækjendur sóttu um starfið af ýmsum ástæðum og voru flestir ánægðir með daginn.

„Ég er að sækja um því ég hef gaman af þjónustustörfum og er að leita mér að vinnu í vetur og næsta vor,“ segir Guðrún Sara Örólfsdóttir, einn umsækjandinn.