Sigmundur Davíð segir viðbrögð nettrölla jafn sterk og stöðug og verðtryggð íslensk króna

Sigmundur Davíð Gunnlaugsson forsætisráðherra þakkar nettröllum fyrir að deila fréttum upp úr viðtali sem ráðherrann veitti í morgunþættinum Í bítið á Bylgjunni í gær. Sigmundur sagðist hafa reynt að útskýra í þættinum að vaxtarstig gjaldmiðla réðist ekki af því hvað myntin heitir. 

„Í því skyni vísaði ég til þess sem margir gagnrýnendur verðtryggingakerfisins hafa bent á, þ.e. að verðtryggð króna sé í raun sterkasti og stöðugasti gjaldmiðill heims vegna þess að lánveitandinn er alltaf öruggur um að fá allt sitt til baka og lántakinn ber alla áhættuna. Ég reyndi ekki að eigna mér heiðurinn af því að benda á þetta af því að það hefur verið gert svo oft í umræðu undanfarinnar ára að það er eiginlega orðið frasi fremur en ný sannindi,“ skrifar Sigmundur á Facebook í dag. 

Fyrirsagnir upp úr þessu viðtali voru nokkrar á þá leið að Sigmundur Davíð hefði sagt íslensku krónuna stöðugasta og sterkasta gjaldmiðil í heimi. Sigmundur segir vefmiðla þurfa að fá sína umferð og segir að í mörgum tilfellum hafi þeir gert því ágætis skil um hvað var að ræða í meginmáli fréttanna. 

„En nettröll eru hvorki þekkt fyrir einbeitingu né yfirvegun. Þau komust auðvitað ekki lengra en í gegnum fyrirsögnina, hrukku af hjörunum og deildu fréttunum um allt. Það kom sér ljómandi vel því að fyrir vikið komust fréttirnar til miklu fleira fólks en ella hefðu séð þær og þeir sem höfðu áhuga gátu kynnt sér innihaldið,“ skrifar Sigmundur Davíð.

Hann segir þetta dæmi um hvernig fyrirsjáanleg viðbrögð tröllanna sem deila efninu ólesnu. „Þau eru jafn sterk og stöðug og verðtryggð íslensk króna,“ skrifar Sigmundur. 

Sælt veri fólkið á nýju ári. Vona að jólin hafi verið skemmtileg hjá ykkur og tröllunum líka. Ég var í viðtali á...

Posted by Sigmundur Davíð Gunnlaugsson on Thursday, January 7, 2016