Lögreglustjóri sendir frá sér yfirlýsingu vegna ásakana um einelti

Sigríður Björk Guðjónsdóttir lögreglustjóri á höfuðborgarsvæðinu hefur sent frá sér yfirlýsingu vegna frétta í gær þar sem kom fram að lögreglumaður hjá embættinu hefði kvartað til innanríkisráðuneytisins vegna eineltis lögreglustjóra. Þar segir lögreglustjóri að hún geti ekki tjáð sig um mál einstakra lögreglumanna en að hún virði þau réttarúrræði sem séu til staðar fyrir opinbera starfsmenn, telji þeir á sig hallað.

Greint var frá kvörtun lögreglumannsins á vef RÚV í gær en maðurinn krefur lögregluna á höfuðborgarsvæðinu um bætur vegna framgöngu lögreglustjórans en málið tengist meintri spillingu innan fíkniefnadeildar lögreglunnar.

Maðurinn sem kvartaði undan Sigríði Björk var fullviss um sakleysi vinnufélaga síns sem sakaður hafði verið um spillingu í starfi en héraðssaksóknari rannsakaði mál viðkomandi lögreglumanns. Niðurstaða úr þeirri rannsókn var að ekkert benti til að maðurinn hefði gerst sekur um brot í starfi.

Í yfirlýsingu sinni segir Sigríður Björk að „ákvarðanir sem teknar eru af stjórnendum lögregluembætta eru ekki alltaf líklegar til vinsælda. Það á ekki síst við um þær sem hafa í för með sér breytingar á verkefnum eða valdsviði einstaklinga. Hitt er skýrt að sem lögreglustjóri er það ábyrgð mín að skipta verkum og sú ábyrgð er ótvíræð. Ég hef gert margar breytingar frá því að ég tók við sem lögreglustjóri og miða þær allar að því að gera lögregluna aðgengilegri, skipurit flatara, boðleiðir styttri og en fyrst og fremst að bæta þjónustu okkar við borgarana.“

Þá rekur hún hvernig hún hafi lagt meiri áherslu á tiltekna málaflokka eins og kynferðisbrot, heimilisofbeldi og mansal og segir starfsfólk lögreglunnar hafa unnið frábært starf í erfiðum verkefnum. Hins vegar geti slíkar breytingar verið umdeildar, það er hitt í mark hjá sumum starfsmönnum en valdið óánægju hjá öðrum.

„Ég hef hlustað á ábendingar lögreglumanna en mikið af óánægjunni hefur borist frá nafnlausum aðilum í gegnum fjölmiðla. Ég kysi auðvitað helst að eiga ekki í slíkum samskiptum en vissulega getur sú leið í sumum tilfellum verið eina leiðin fyrir einstaka starfsmenn eða stjórnendur til að koma á framfæri gagnrýni á stjórnvaldsákvarðanir. Fjölmiðlar eiga að veita aðhald og lögreglan er þar engin undantekning frekar en aðrar stofnanir. Ég hef á því fullan skilning og sumt sem fram hefur komið hefur vakið okkur til vitundar um hluti sem mættu betur fara, bæði varðandi innri og ytri samskipti. Ég hyggst leggja mig fram um að hlusta betur á ólík sjónarmið en um leið er enginn bilbugur á mér og samstarfsfólki mínu að halda áfram því umbreytingarverkefni sem við hófum hér hjá embættinu fyrir tveimur árum,“ segir í yfirlýsingu Sigríðar Bjarkar.