Reykur frá skógareldunum í Kanada gæti gert vart við sig hér á landi

Um þessar mundir geisa skógareldar í Kanada og við Íslendingar gætum fundið fyrir því hér á landi samkvæmt Trausta Jónssyni veðurfræðingi. Eldarnir í Alberta í Kanada hafa haldið áfram að magnast dag frá degi. Síðan á föstudag hefur eldsvæðið þrefaldast að flatarmáli og búist er við því að ástandið eigi enn eftir að versna.

„Ég á von á því en það er svosem ekki alveg víst,“ segir Trausti.

Trausti útskýrir málið á bloggsíðu sinni: „Eldarnir í Kanada vekja mikla athygli og mun reykjaslóðans frá þeim trúlega um síðir verða vart hér á landi - það er vaninn þegar miklir eldar brenna þar vestra. En sem stendur er hringrás lofthjúpsins mjög lengdarbundin sem kallað er á svæðinu milli eldanna og okkar.“

Blási vindarnir í austur eru allar líkur á að reykjarslæða sjáist hér á landi og þá helst við sólarlag. Hins vegar segir Trausti vinda þannig núna að reykurinn fer mest suður. Hann gerir því ekki ráð fyrir því að næstu fimm daga geri reykurinn frá Kanada vart við sig hér á landi. Stjórnvöld í Alberta telja allar líkur á að glíman við eldana geti staðið yfir mánuðum saman, enda ekkert lát á þurrkatíðinni.

„Það gerðist árið 1950, þá voru miklu stærri skógareldar í Kanada og það brann tíu sinnum meira en núna. Þá vildi svo til að það var skýjað hér á landi þegar þetta var mest en það varð til þess að sólin varð blá. Þegar ég skoða þetta vona ég alltaf að sólin verði blá,“ segir Trausti. Hann segir þó ólíklegt að sólin verði blá hér á landi og að hann vonist að sjálfsögðu ekki raunverulega til þess að það gerist því að það myndi þýða að eldarnir í Kanada væru að sækja í sig veðrið. 

„Ýmsir aðilar reyna að mæla slóðann og spá fyrir um ferðir hans næstu daga. Þar á meðal er evrópskt verkefni sem nefnist „Copernicus atmosphere monitoring service“, CAMS, notar spár evrópureiknimiðstöðvarinnar og mælingar gervihnatta,“ skrifar Trausti á síðu sína. CAMS spáir til næstu fimm daga. Spárnar eru birtar um „lýsisþykkt“ og reynt er að greina á milli uppruna mengunar, það er að segja uppruna eftir lífefnaösku, sjávarseltu, ryks og súlfata. Spáin á myndinni í fréttinni sýnir spá um lýsiþykktarauka vegna lífefnaösku yfir Norður-Ameríku á morgun – því meiri sem lýsiþykktin er því meiri er mengunin.

Trausti segir líklegt að um síðir muni eitthvað af reyknum frá skógareldunum að vestan berast til okkar. „Fróðlegt verður að fylgjast með því ef af verður, sem er ekkert víst.“