Rannsaka hvort andlát íslenskrar konu tengist neyslu læknadóps

Lögreglan á höfuðborgarsvæðinu rannsakar hvort andlát íslenskrar konu aðfaranótt fimmtudags tengist neyslu læknadóps. 

Konan sem lést er um þrítugt og lést hún í heimahúsi aðfaranótt fimmtudags. Grunur leikur á að konan hafi misnotað lyfseðilsskyld lyf en ekki fengust upplýsingar um hvaða lyf það væru. Rannsókn málsins er skammt á veg komin en miðar vel að sögn lögreglu.

Samkvæmt upplýsingum frá landlæknisembættinu eru 27 dauðsföll á árinu til skoðunar þar sem grunur leikur á að dauðsföllin megi rekja til lyfjaeitrunar. Árið 2015 voru dauðsföllin 36.

Þá er enn í rannsókn hjá lögreglunni á höfuðborgarsvæðinu hvort andlát ungs manns í lok ágúst tengist neyslu læknadóps en annar ungur maður missti meðvitund sömu nótt og leikur grunur á að það tengist neyslu á sama lyfi eða lyfinu Fentanýl. Enn er beðið eftir endanlegri niðurstöðu í þeim málum.

Embætti landlæknis og lögreglan á höfuðborgarsvæðinu funduðu um misnotkun lyfseðlisskyldra lyfja hér á landi í byrjun september. Bæði embættin hafa áhyggjur af misnotkun lyfjanna meðal ungs fólks í dag. Niðurstaða fundarins var meðal annars sú að embættin vinni nú nánar saman að því að upplýsa hvaðan lyfin koma og hvernig fólk verður sér úti um þau.