Vilja afslátt af námslánum til Vestfirðinga

Lagt er til að námslán íbúa á Vestfjörðum verði lækkuð með afsláttum og íbúar svæðisins fari í lægra skattþrep, fyrirtæki fái lægra tryggingargjald en önnur og að tvenn jarðgöng verði skoðuð, Dýrafjarðargöng og Álftafjarðargöng í Ísafjarðardjúpi, samkvæmt nefnd um samfélags og atvinnuþróun á Vestfjörðum sem Sigurður Ingi Jóhannsson forsætisráðherra skipaði þann 21. júní síðastliðinn.

Nefndinni var ætlað að vinna aðgerðaáætlun fyrir Vestfirði í ljósi neikvæðrar byggðaþróunar í landshlutanum síðustu áratugi. Í niðurstöðum nefndarinnar kemur meðal annars fram að störf í stoðkerfi fiskeldis verði staðsett á Vestfjörðum og landshlutinn gerður að miðstöð fiskeldis. Þannig yrðu störf frá Matís, Fiskistofu og Hafrannsóknastofnun og önnur rannsóknatengd starfsemi fiskeldis færð á Vestfirði.

Pétur Georg Markan, formaður Fjórðungssambands Vestfjarða, segir vinnuna hafa verið til fyrirmyndar. „Heildarhagsmunir svæðisins voru hafðir að leiðarljósi, sem grundvallar góða niðurstöðu nefndarinnar,“ segir Pétur. „Það þarf tvennt að koma til svo góður viðsnúningur náist. Hið opinbera þarf að koma af meira afli í innviðauppbyggingu á svæðinu og skoða þarf hvort ekki sé hægt að vinna betur saman, til aukinnar hagræðingar, sem myndi skila sér í betri þjónustu og meiri lífsgæðum fyrir íbúa.“

Lagt er til að afsláttur verði gefinn af námslánum og þeir sem setjast að á Vestfjörðum eftir nám njóti lægra skattþreps. Einnig að tryggingargjald verði lækkað hjá fyrirtækjum á svæðinu. Lagt er til að settur verði á fót starfshópur ráðuneyta og Byggðastofnunar til að vinna að útfærslum í málinu. Þá er lagt til að gera svæðisbundna samgönguáætlun með það að markmiði að samgöngur verði í sama horfi og annars staðar á landinu á næstu átta árum.

Ásthildur Sturludóttir, sveitarstjóri Vesturbyggðar, segir skýrsluna ágæta en meira þurfi til. „Þessi vinna er gott skref í rétta átt en mun ekki valda grundvallarbreytingu í búsetuskilyrðum á Vestfjörðum. Til þess að svo megi verða þarf að koma með mun meira fjármagn og hafa uppi mun stærri áform,“ segir Ásthildur. 

Fréttin birtist fyrst í Fréttablaðinu.