Ekki vitað hvenær ferðamaðurinn sem fannst á Snæfellsnesi lést

Ferðamaðurinn sem fannst látinn við Löngufjörur á Snæfellsnesi síðastliðinn sunnudag var breskur og var á sjötugsaldri.

Maðurinn fannst eftir nokkurra klukkutíma leit skammt frá bíl sem hann hafði tekið á leigu en að sögn Jónasar Ottóssonar, lögreglufulltrúa hjá lögreglunni á Vesturlandi, er ekki vitað hversu lengi maðurinn var látinn áður en hann fannst.

Þá er ekkert hægt að segja til um dánarorsök mannsins þar sem niðurstaða úr krufningu liggur ekki fyrir en Jónas segir að enginn grunur leiki á að eitthvað saknæmt hafi átt sér stað.

Bílaleigubílnum átti að skila á laugardeginum og þá átti maðurinn einnig bókað flug úr landi, en skilaði sér ekki í það. Í kjölfarið hófst leit að manninum.