Ungir drengir leggja meiri áherslu á útlitið

Drengir í 6. og 8. bekk leggja meiri áherslu á útlit en kvenkyns jafnaldrar þeirra, en munurinn hverfur þegar komið er í 10. bekk. Drengir leggja þá minni áherslu á útlit. Drengir á unglingsaldri hafa einnig meira keppnisskap en stúlkur á sama aldri. Sterkt marktækt samband er því á milli keppnisskaps og áherslu á útlit, segir Guðmundur Torfi Heimisson, lektor við Háskólann á Akureyri.

Þetta kemur fram í rannsókn á vegum Rannsóknarseturs forvarna við Háskólann á Akureyri, sem Guðmundur Torfi vann að. Markmið rannsóknarinnar var að kanna samband keppnisskaps grunnskólanema og áherslu á að líta vel út. Einnig var skoðað hvort ástundun líkamsræktar hefði áhrif á sambandið.

Guðmundur Torfi segir rannsóknina hafa leitt í ljós að 44% nemenda í 10. bekk finnist bæði mjög mikilvægt að líta vel út og að vinna í keppni. Einnig komi fram að 77% þeirra sem ekki finnst mikilvægt að líta vel út finnist sömuleiðis ekki mikilvægt að vinna keppni. Guðmundur Torfi segir einnig sterk tengsl vera á milli keppnisskaps, áherslu á að líta vel út og íþróttaástundunar. Hann segir þá sem hreyfa sig oftar vera mun líklegri til að leggja meiri áherslu á útlit og að vinna keppni. Eftir því sem keppnisskap aukist, aukist ástundun íþrótta, og öfugt.

Rannsóknin var gerð á landsvísu árið 2015 og tók til nemenda í 6., 8., og 10. bekk. Þátttakendur í 10. bekk voru 3618 en þátttakendur í 6. og 8. bekk voru samtals 7401. Rannsóknin er hluti af stærra alþjólegu verkefni um heilsu og líðan skólanema sem Alþjóða heilbrigðismálastofnuni (WHO) stendur fyrir. Rannsóknarsetur forvarna við Háskólann á Akureyri annast framkvæmdir hér á landi.

Guðmundur Torfi segir að niðurstöðurnar gætu nýst mörgum, til dæmis foreldrum, kennurum og íþróttaþjálfurum en að of snemmt sé að draga of víðtækar ályktanir og að fleiri rannsóknir þurfi að gera.

Fréttin birtist fyrst í Fréttablaðinu 18. apríl.