Sigmundur Davíð Gunnlaugsson forsætisráðherra mun í dag ferðast til Líbanon þar sem hann mun kynna sér aðstæður flóttamanna á svæðinu.
Mun forsætisráðherra heimsækja ýmsar stofnanir sem vinna að málefnum flóttamanna á borð við Flóttamannahjálp Sameinuðu þjóðanna. Sigmundur Davíð mun einnig heimsækja flóttamannabúðir á vegum Flóttamannahjálparinnar.
Talið er að um tvær milljónir sýrlenskra flóttamanna hafist nú við í flóttamannabúðum í Líbanon auk 500 þúsund palestínskra flóttamanna.
Ráðgert að forsætisráðherra muni funda með forsætisráðherra Líbanon þar sem rætt verður um samskipti og viðskipti ríkjanna og um aðstæður flóttamanna í Líbanon, kynna sér þau áhrif sem átökin í Sýrlandi og gríðarlegur fjöldi flóttamanna þaðan hefur haft á líbanskt samfélag og afla upplýsinga um hvernig alþjóðleg framlög geta best komið að liði.
Síðar í vikunni heldur Sigmundur Davíð til London þar sem hann mun sækja sérstakan leiðtogafund um málefni Sýrlands í London í boði forsætisráðherra Bretlands, Þýskalands, Noregs og Kúveit auk þess sem hann mun taka þátt í kynningu í sendiráði Íslands í tilefni af markaðssetningu og sölu íslensks skyrs í Bretlandi.
Sigmundur Davíð fer til Líbanon
Tengdar fréttir
„Munar miklu að horfa framan í andlitin frekar en að vera sífellt að rýna í tölur“
Erna Kristín Blöndal skoðaði aðstæður í flóttamannabúðum í Tyrklandi og Líbanon og segir ljóst að grípa þurfi til aðgerða strax til að koma í veg fyrir miklar hörmungar.
Nágrannar Sýrlands herða reglur varðandi flóttamenn
Sýrlendingum hefur verið gert erfiðara um vik að flýja borgarastyrjöld sem hefur nú geisað rúm fjögur ár.
