Ögmundur segir Davíð geta afsalað sér forsetalaunum

„Ég hefði haldið það,“ segir Ögmundur Jónasson, fyrrverandi ráðherra, aðspurður hvort Davíð Oddsson, ritstjóri Morgunblaðsins og fyrrverandi forsætisráðherra, geti afsalað sér forsetalaunum líkt og Davíð hefur lofað nái hann kjöri.

Kjarninn greindi frá því í fyrr í dag að embættismenn á vegum ríkisins og eru á launaskrá þess, þar með taldir ráðherrar í ríkisstjórn og forseti Íslands, geti ekki afsalað sér launum frá ríkinu og staðfesti Fjársýsla ríkisins það.

Ögmundur Jónasson afsalaði sér hins vegar ráðherralaunum þegar hann var heilbrigðisráðherra árið 2009 og svo einnig þegar hann settist í stól innanríkisráðherra árið 2010.

Í samtali við Vísi segist Ögmundur ekki hafa mætt neinni andstöðu frá ríkinu þegar hann tók þá ákvörðun. „Ég bara skrifaði undir ósk þar að lútandi og þar með var málið afgreitt,“ segir Ögmundur.

Vísir sendi fyrirspurn á Fjársýslu ríkisins og spurði hvort Ögmundi hafi verið þetta heimilt. Í svari frá Fjársýslunni kemur fram að stofnunin geti ekki veitt upplýsingar um málefni einstakra ríkisstarfsmanna.

Í svarinu er hins vegar vísað í aðra málsgrein 9. greinar stjórnarskrárinnar en þar segir að ákveða skuli með lögum greiðslur af ríkisfé til forseta og þeirra, sem fara með forseta vald. Óheimilt skal að lækka greiðslur þessar til forseta kjörtímabilið hans. 

„Með vísan til þessa skal greiða forseta laun og hann getur því  ekki afþakkað laun.  Laun eru endurgjald fyrir vinnuframlag og ber vinnuveitanda að inna laun af hendi auk launatengdra gjalda í ýmsa sjóði.“