Norskur piltur sem myrti vin sinn í fyrra ætlaði að fremja fjöldamorð í skóla

Lögreglan í Noregi telur að pilturinn sem myrti vin sinn þar í landi í fyrra hafi ætlað að kveikja í skólanum sínum og brenna þannig marga samnemendur sína inni.

Greint er frá þessu á vef norska dagblaðsins Verdens Gang. Þar segir að pilturinn, 19 ára, hafi ætlað að verða samferða vini sínum, hinum átján ára gamla Joakim Ophaug Røksland, að skólanum sem þeir sóttu í bænum Mandal, 22. apríl í fyrra. Verdens gang segir piltinn hafa haft í hyggju að kveikja í samkomusal skólans á þeim tíma sem hann vissi að margir nemendur yrðu saman komnir þar þennan dag. 

Ætlaði að koma í veg fyrir að vinur sinn myndi brenna inni

Hefur Verdens gang eftir lögreglunni Joakim hafi ekki vitað betur en þeir tveir hafi verið á leið í skólann. Þegar Joakim kom hins vegar heim til piltsins varð raunin önnur.  Pilturinn batt Joakim fastan til að koma í veg fyrir að Joakim færi með honum í skólann og myndi þar með bíða bana. Pilturinn ætlaði síðan að taka bíl Jóakims og fara á honum í skólann. Þegar þarna var komið við sögu hafði pilturinn, samkvæmt Verdens Gang, klætt sig í hermannagalla og skothelt vesti.

Þegar hann hins vegar fann ekki lyklana að bíl Joakims reiddist hann snögglega og drap hann með sveðju.

Meta hvort hann sé sakhæfur

Ríkissaksóknari í Noregi gaf út ákæru gegn piltinum, sem hefur ekki verið nafngreindur, í dag. Verjandi hans sagði við Verdens gang að pilturinn gangist við glæpnum en nú sé verið að meta hvort hann sé sakhæfur. Verði hann metinn ósakhæfur verður hann vistaður á stofnun í stað fangelsis.

Eftir að hafa myrt vin sinn lagði pilturinn af stað vopnaður startbyssu, tveimur eftirlíkingum af skotvopnum og hnífi. Er hann sagður hafa hótað nágranna vinar síns með startbyssunni áður en hann kom við í verslun á leið í skólann til að fá sér vatn.

Skömmu síðar handtók lögreglan hann eftir að hafa fengið tilkynningar frá vegfarendum um undarlega hegðun hans. Verdens gang segir piltinn hafa verið búinn að ákveða að láta lífið í skotbardaga við lögreglu eftir að hafa kveikt í skólanum.

Lögreglan telur piltinn hafa undirbúið þetta ódæði í þó nokkurn tíma áður en hann lét til skara skríða í fyrra.

Hafði verið til skoðunar hjá norsku leyniþjónustunni

Þetta var ekki í fyrsta skiptið sem lögreglan hafði heyrt af þessum pilti því mánuði fyrir þennan atburð hafði móðir hans haft samband við lögreglu og lýst yfir áhyggjum vegna sonar síns.

Samkvæmt heimildum Verdens Gang hafði pilturinn lagt á ráðin um að ganga til liðs við hersveitir Kúrda í Írak til að berjast við hryðjuverkasamtökin ISIS.

Eftir að hafa rætt við móður hans hafði lögreglan samband við norsku leyniþjónustuna sem upplýsti að hún hefði fylgst með piltinum. Í ljósi þess að slík ferð né tilgangur hennar væri ekki brot á norskum lögum gerði leyniþjónustan ekki meira í málinu.