Hlynur framlengir um fimm ár við Sundsvall

Hlynur Bæringsson, fyrirliði íslenska körfuboltalandsliðsins, skrifaði undir fimm ára framlengingu á samningi sínum við sænska úrvalsdeildarliðið Sundsvall Dragons.

Samningurinn er til þriggja ára með möguleika á framlengingu um tvö ár í einhverju hlutverki hjá félaginu. Hlynur hefur leikið með Sundsvall síðustu fimm tímabil og verður því hjá félaginu í áratug ef hann klárar nýundirritaðan samning.

Hlynur, sem er 33 ára, var með 13,8 stig, 9,5 fráköst og 3,3 stoðsteningar að meðaltali í leik á síðustu leiktíð. Sundsvall komst í undanúrslit sænsku deildarinnar.

Sundsvall missti hins vegar Íslending frá sér á dögunum þegar Jakob Sigurðarson ákvað að sigla á önnur mið og semja við sænska liðið Borås Basket.