Iðnaðarmenn vilja hækka byrjunarlaun í 381 þúsund

Iðnaðarmenn vilja að byrjunarlaun þeirra verði krónur 381.326 á mánuði auk þess að almenn launahækkun verði 20%. Þá verði núverandi launakerfi endurskoðuð.

Þetta er meðal þess sem fram kemur í sameiginlegri kröfugerð sambanda- og félaga iðnaðarmanna sem lögð var fram í dag á fundi með Samtökum atvinnulífsins.

Einnig er farið fram á að verði samið til lengri tíma en eins árs verði laun þeirra verðtryggð.

Þá vilja iðnaðarmenn átak í að draga úr yfirvinnu samhliða því að dagvinnulaun verði hækkuð svo þau dugi til framfærslu.

Samkvæmt kröfugerðinni á að vera hægt að ná þessu markmiði m.a. með aukinni framleiðni og hagræðingu í fyrirtækjum svo ekki komi til raunverulegs kostnaðarauka hjá fyrirtækjum.

Samtök atvinnulífsins hafa gefið út að svigrúm sé til 3-4 prósenta launhækkana.

Sjá má kröfugerðina í heild sinni hér.