Nóvemberspá Siggu Kling – Hrútur: Gleðin bankar upp á!

Elsku duglegi og skemmtilegi hrúturinn minn. Þó að þú sért á fullri ferð í lífinu núna er margt sem þú ættir hreinlega að skila til fortíðarinnar og ekki vera að velta þér upp úr. Því að margt af þessu er gamalt, mundu að gærdagurinn er búinn og það er dagurinn í dag sem skiptir máli.

Þú þarft að átta þig á því hverju þú nennir. Ef þú hefur sterkt á tilfinningunni að þú eigir að sleppa einhverju sem þú ert að gera, slepptu því þá! Og gerðu það eins fljótt og þú getur.

Þá kemur fram þessi fallegi kraftur sem þú býrð yfir og hann kemur þér hratt og örugglega áfram á hamingjustaðinn þinn.

Þú finnur fyrir einhverjum móral, hann hefur ekkert með þig að gera heldur eru það áhyggjur yfir því hvað öðrum finnst.

Þú þarft að segja upphátt og með tilfinningu „mér er skítsama hvað öðrum finnst" því orð eru álög elskulegur og stundum þarf maður að segja hlutina upphátt til þess að trúa þeim.

Þú færð svo skemmtilegt tilboð og þú þarft bara að þora að taka því og í kjölfarið fyllist líf þitt af litum.

Það er dálítil sorg í orkunni þinni. Kannski veistu ekki af hverju hún er þarna og ekki spá of mikið í henni vegna þess að gleðin er við það að fara að banka upp á hjá þér og hún tekur með sér nýtt fólk og uppákomur sem munu koma þér á óvart!

Þegar þú vaknar á morgnana hugsaðu þá að þú sért tilbúinn í góðan dag. Það er allt að magnast upp hjá þér svo vertu tilbúinn að taka á móti. Grámygla í veðrinu og endalausar lægðir hafa sérlega mikil áhrif á þig, elsku hrúturinn minn. En krafturinn og birtan kemur þegar snjórinn byrjar að falla og himinninn verður heiðskír, það mun marka nýtt upphaf hjá þér.

Ef þú hefur áhuga á ástinni þá hefur hún áhuga á þér.

Mottó: Allt mun ganga vel.

Frægir hrútar: Hera Björk Þórhallsdóttir söngkona, Silvía Lovetank listamaður, Marta María Jónasdóttir á Smartlandi, Björgvin Halldórsson söngvari, Kári Stefánsson vísindamaður, Vigdís Finnbogadóttir, fyrrverandi forseti, Hugh Hefner, Birgitta Jónsdóttir Pírati, Anna Svava Knútsdóttir leikkona, Elton John söngvari, Þóra í Atlanta, Sigmar Guðmundsson sjónvarpsmaður, Berglind Pétursdóttir, Steinunn Jónsdóttir, sönkona AmabAdamA, Kristín Þorsteinsdóttir, aðalritstjóri 365 miðla.