Leigir þessi af þér á Airbnb?

Er mannkynið gott í eðli sínu? Er því yfirhöfuð treystandi - hvað þá fyrir heimili manns? Þessum spurningum reyndi vefsíðan Airbnb að leita svara við í nýrri auglýsingaherferð sem var ýtt úr vör fyrr í mánuðnum.

Í flaggskipi herferðarinnar má sjá kornabarn í bleyju sem kjagar í átt að útidyrahurðinni meðan kvenmannsrödd les upp heimspekilegar vangaveltur yfir dramatískum undirleik.

Netverjar skilja hvorki upp né niður í auglýsingunni, sem má sjá hér að neðan, og rúmlega 28 prósent þeirra sem gefið hafa myndbandinu einkunn sagst vera ósáttir við það.

„Bíddu, leigði barnið þetta hús á Airbnb? Hvað þýðir þetta eiginlega?“ spyr einn í athugasemdakerfinu fyrir neðan meðan annar hefur töluvert meiri áhyggjur af því að foreldrar þess kunni að hafa gleymt því einu heima.

Húmoristarnir í Portal A hafa nú gert sprenghlægilega, en um leið töluvert raunverulegri endurgerð af myndbandinu þar sem barninu hefur verið skipt út fyrir mann á nærbuxunum einum fata.

Hann kjagar einnig, að öllum líkindum timbraður eftir drykkju gærkvöldsins, með viskíglas í hönd meðan sögumaðurinn segir sögur af því hvernig hann horfði á klám í eldhúsinu þínu og mun smita þig af útbrotunum sem hann er með.

Myndböndin tvö fylgja hér að neðan, hið húmoríska fyrst og upprunalega auglýsing Airbnb þar fyrir neðan til samanburðar.