Sævar í Leonard mun sitja í fangelsi í 3 mánuði

Sævar Jónsson, sem jafnan er kenndur við Leonard, var í Héraðsdómi Reykjaness í dag dæmdur í 12 mánaða fangelsi fyrir skilasvik. Þar af eru  9 mánuðir skilorðsbundnir og mun Sævar því sitja inni í 3 mánuði.

Sævari var gefið að sök að hafa komið undan íbúðarhúsi í Flórída sem hann og eiginkona hans keyptu árið 2007 á rúmlega 657 þúsund Bandaríkjadali, eða 86 milljónir króna á núverandi gengi, skömmu áður en hann var úrskurðaður gjaldþrota árið 2010.

Húsið er staðsett í Suður-Flórída, nánar tiltekið í Boynton Beach. Sævar átti húsið að hálfu á móti eiginkonu sinni, Hildi Daníelsdóttur. Fasteignin hafði fallið í verði og var hún metin á rúmlega 272 þúsund dali í upphafi árs 2010.

Sama ár afsalaði Sævar eigninni fyrir um tíu Bandaríkjadali, sem á núverandi gengi eru rúmar 1.400 krónur, til félags sem hann var stjórnarformaður í. Hann er þannig sagður hafa skotið eignarhluta sínum undan búskiptunum eða varið andvirði eignarhlutans til greiðslu tiltölulega hárrar gjaldkræfrar kröfu.Félagið sem um ræðir er svissneskt og var stofnað árið 2009 af Sævari og viðskiptafélaga hans, Nand Kumar Kurup.

Við aðalmeðmerð málsins sagðist Sævar hafa látið húsið af hendi árið 2007 en að formlega hefði ekki verið gengið frá sölu á húsinu fyrr en árið 2010. Það var rétt áður en Sævar var úrskurðaður gjaldþrota. Hann sagðist hafa skuldað Kurup 145 þúsund dali, jafnvirði 20 milljónir króna á núverandi gengi, og því hafi ákvörðun verið tekin um að Kurup tæki húsið upp í skuldina.

Héraðsdómur telur sannað að Sævar hafi haft einbeittan ásetning um að koma húsinu í Flórída undan svo að kröfuhafar í þrotabú hans biðu fjártjón. Þá hafi hann jafnframt gefið skiptastjóra búsins og lögreglu rangar upplýsingar þegar tilvist hússins á Flórída var rannsökuð. Þá hafi hann gert málamyndagjörning til að villa um fyrir hvaða tilgangur væri með sölu hússins og seldi eigninga svo á óhæfilega lágu verði.