Snoop Dogg heldur partí í Laugardalshöll

Rappgoðsögnin Snoop Dogg kemur hingað til lands í júlí og heldur partí í Laugardalshöll. Þetta staðfestir Vilhjálmur Sanne tónleikahaldari. Snoop Dogg hefur áður komið til landsins, en þá hélt hann tónleika. Nú er hann í öðrum erindagjörðum. Nú kemur rapparinn fram sem DJ Snoopadelic, en hann hefur ferðast um heiminn og haldið veislur víðs vegar. Snoop stýrir þá gleðskap í nokkra klukkutíma, leikur sína uppáhaldstónlist í bland við eigin lög sem hann rappar.

„Við munum breyta Laugardalshöll í heljarinnar klúbb. Snoop mun stýra tæplega þriggja klukkustunda partíi. Hann mun stýra tónlistinni og rappa og verður með dansara með sér á sviðinu. Þetta verður heljarinnar veisla,“ útskýrir Vilhjálmur, en ásamt honum stendur Ragnar Thor Hilmarsson að komu rapparans hingað til lands en saman eiga þeir Nordic Events. Auk þeirra hefur Kristinn Bjarnason aðkomu að herlegheitunum. Þessar uppákomur Snoop Dogg hafa fengið góða dóma erlendis.

Sjálfur segist Snoop hafa mikinn áhuga á því að vera plötusnúður og að hann leggi sig mikið fram við að finna ferska tónlist. „Ég er alltaf að brýna sverðið mitt,“ sagði hann í viðtali við tímaritið Vibe um hvort hann æfði sig mikið sem plötusnúður.

Partíið verður haldið þann 17. júlí, þannig að það verður nákvæmlega áratugur frá síðustu heimsókn rapparans til landsins. Hann tróð upp í Egilshöll þann 17. júlí 2005 og mættu sjö þúsund manns.

Snoop Dogg er einn þekktasti rappari heims. Hann kemur frá Long Beach í Kaliforníu í Bandaríkjunum. Plötur Snoop, sem er 44 ára gamall, hafa selst í yfir 30 milljónum eintaka um allan heim. Hann gaf út sína fyrstu plötu árið 1992. Sú bar titilinn Doggystyle og skaut honum á stjörnuhimininn. Í maí kemur þrettánda breiðskífa kappans út. Hún kallast Bush og er unnin í samvinnu við hinn geysivinsæla Pharrell Williams.

Forsala í partíið með Snoop Dogg hefst seinnipart mánudags. Almenn miðasala hefst fimmtudaginn 30. apríl. Til að eiga kost á að næla sér í miða í forsölu, er fólki bent á að skrá sig á Miðavaktina hjá Midi.is og fylgjast vel með Facebook síðum Nordic Events og Midi.is.