„Hélt að Saga myndi hafa þetta"

„Þetta var frekar klikkað, ég hélt nefnilega að Saga myndi vinna þetta,“ segir nýbakaður sigurvegari Söngkeppni framhaldsskólanna, Karólína Jóhannsdóttir.

Karólína er tvítugur nemandi Menntaskólans í Reykjavík, sem stundar nám við nýbálabraut þar á bæ.  Hún söng sig rækilega til sigurs ásamt fríðu föruneyti með laginu Go Slow sem hljómsveitin Haim gerði frægt.

„Ég vissi að ég ætti möguleika á að vinna þessa keppni en ég taldi ekki ólíklegt að Saga myndi hafa þetta,“ svarar Karólína er hún er spurð hinnar klassísku spurningar hvort hún hafi átt von á sigrinum.

„En þegar tilkynnt var að hún væri í þriðja sæti bjó ég mig undir það besta,“ bætir hún glaðlega við og að vonum skýjum ofar.

Annað sætið hreppti Aron Hannes Emilsson fyrir hönd Borgarholtsskóla og téð Saga Matthildur Árnadóttir söng fyrir Fjölbrautaskólann í Garðabæ og hafnaði í þriðja eins og áður segir.

Karólína segist hafa fagnað sigrinum í faðmi vina og vandamanna að lokinni keppni, syngjandi Abba-lög í miðborginni. Ekki fór hún varhluta af öllum kveðjunum, en henni var drekkt rækilega í hamingjuóskum næturlangt.

„Það var rosalega gaman, fólk var að segja svo mikið af fallegum hlutum. Þetta var bara geggjað í alla staði,“ sagði Karólína.

 Fjölmargir tónlistarmenn hafa komið sér á kortið eftir þátttöku í keppninni, svo sem Emiliana Torrini, Páll Óskar, Sverrir Bergmann svo sárafáir séu nefndir.  Um framhaldið segist Karólína alls ekki viss, en hún er einkum og aðallega upptekin við að koma sér aftur niður á jörðina. „Þetta var mögnuð reynsla, við sjáum svo til,“ bætti hún við í blálokin.