Margfaldur Grammy verðlaunahafi aðstoðar Sylvíu við upptökur á hennar fyrstu plötu

Sylvía Erla Melsted hefur lokað sig af inni í hljóðveri ásamt Printz Board, tónlistarstjóra einhverra frægustu tónlistarmanna samtímans. Má þar nefna stórstjörnur á borð við Dr. Dre, The Black Eyed Peas, James Brown, Katy Perry og Sheryl Crow. „Hann er að hjálpa mér gríðarlega mikið, ekki bara í útsetningum heldur með allt milli himins og jarðar,“ segir þessi unga söngkonan sem er rétt orðin nítján ára. „Ég er enn þá að finna mig í tónlistinni svo ég er ofboðslega þakklát fyrir að fá mann af hans kaliberi til að hjálpa mér. Það er ómetanlegt.“

Vinnur aðeins með útvöldum

Board virðist sjálfur ekki minna heillaður af Sylvíu : „Ég heillaðist samstundis af persónuleika hennar og kraftinum sem einkennir hana. Hún er stútfull af hugmyndum og ég varð strax spenntur fyrir að vinna með henni.“

Sylvía komst í samband við Board í gegnum sameiginlegan vin þeirra og hitti hann svo í Los Angeles um síðustu jól. „Það gekk allt svo vel að við ákváðum að hjóla í þetta saman,“ segir hún. Sylvía segir Board leggja sitt á vogarskálarnar við tónlistina en sjálf semji hún textana alveg ein.

Hugsar stórt

„Platan er poppskotin, smá R‘n‘B og svolítið rokk. Við vildum ekki hafa þetta of poppað heldur skapa einhvers konar sérstöðu. Það er erfitt fyrir Íslending að ætla að ná langt úti í heimi án þess að hafa einhverja sérstöðu,“ segir hún, en plata er öll á ensku og stefnan tekin á að hún komi út á þessu ári. Hún ætlar sér út fyrir landsteinana með sitt efni og greinilegt að hún er stórhuga þrátt fyrir ungan aldur. „Nú legg ég áherslu á að taka upp plötuna samhliða því að ljúka náminu mínu í Versló,“ útskýrir Sylvía og bætir við að hún sé með mörg járn í eldinum og enn fleiri, sem hún þurfi að koma frá sér í nánustu framtíð.

Aðspurð segjast þau ekki hafa mikinn tíma til að sinna hlutverkum túrista á meðan á dvöl kappans stendur. Board segist þó hafa mikinn smekk fyrir næturlífinu sem hann ætlar sér að skoða betur þegar tækifæri gefst til.

Sylvía er sennilega flestum Íslendingum kunn eftir að hún keppti í Söngvakeppni sjónvarpsins 2013. Þar freistaði hún þess að keppa fyrir hönd Íslands með lagið „Stund með þér“ við afar góðan orðstír.