Flight Facilities á Secret Solstice

Ástralska rafsveitin Flight Facilities mun troða upp á Secret Solstice næsta sumar. Sveitin hefur getið sér gott orð fyrir framkomu á tónleikum og vakti hún nýverið sérstaka athygli fyrir myndbandið við lagið Down to Earth. Leikarinn Sam Rockwell kom fram í myndbandinu en hann er þekktur fyrir leik sinn í myndum á borð við Confessions of a Dangerous Mind og The Green Mile.

„Við erum mjög stolt að kynna Flight Facilities til leiks,“ segir Friðrik Ólafsson, framkvæmdastjóri Secret Solstice, og heldur áfram: „Sveitin spilar mjög flotta og lifandi hústónlist og mun spila á stóra sviðinu hjá okkur.“

Flight Facilities gaf út plötuna Down to Earth í fyrra og naut sveitin mikilla vinsælda í fjölfarið. Nú í ár hefur hún sent frá sér tvö lög sem hafa ratað á vinsældalista í Ástralíu og eru meðlimir sveitarinnar nú á leið til Bandaríkjanna á tónleikaferðalag. 

Sam Rockwell segist einmitt hafa hrifist af sveitinni og hafi því verið meira en tilbúinn að koma fram í myndbandinu. „Mér finnst gaman að hrista á mér stélið,“ sagði hann í viðtali og bætti við að hann hefði lært ný dansspor við gerð myndbandsins sem munu nýtast honum á dansgólfinu til frambúðar.